September ni 23, 2025 (Thawhlehni) khan Serchhip District Boxing Association (SEDBA) chuan an lawm lohna Mizoram Boxing Association hnenah an thlen a, MSSC Golden Jubilee 44th Mizoram State Boxing Championship 2025-ah an boxer leh an official thawhte tel tir loh an tum thu an hrilh.
SEDBA chuan, "Mipat hmeichhiatna lam rawngkaia Boxer te lo khawih thin avanga POCSO case avanga jail tang mek MIZBA ROC Chairman T. Lalthlengliana thlavang MIZBA in in hauh avangin kan District aiawha khel tur Hmeichhe Boxer 3, POCSO case file tute khelh ve in phal lo tih kan lo hria a, Boxer te thlavang hauh lova, a khawih chingpen tumtu thlavang MIZBA in a hauh zawk hi a mak kan ti hle," tiin an complain-naah chuan an ziak lang nghe nghe.
SEDBA chuan heng POCSO victim pathumte inkhelh phal turin MIZBA chu an ngen a, an ngenna a hlawhtling lo a nih chuan Serchhip District atanga Boxer leh R&J Official Duty tura kal te zawng zawng pawh hruai haw vek an tum thu thlengin an complain letter-ah hian an tarlang a ni.
MIZBA-in POCSO case file-tu hmeichhia te an lo hnawl dan chungchang hi Child Welfare Committee beng a lo thleng a, anni chuan hma la nghalin, Mizoram chhunga Sports hrang hrang khaikhawmtu Mizoram State Sports Council hnenah thu a thlen. Hemi chungchang hi MSSC pawhin a ngaipawimawh hle a, September ni 24, 2025 (Nilaini) khan thuchhuah an siam ve nghal a, POCSO victim-te an tih dan chungchang hi insawifiah turin MIZBA chu a hriattir a, an insawifiah hma chu 44th Mizoram State Boxing Championship, Lungleia neih chu titawp turin a hriattir.
September ni 24, 2025 (Nilaini) tlai khan MIZBA chuan an insawifiahna MSSC hnenah an thawn ve nghal a, an lehkhaa an tarlan danin, MIZBA Executive Committee chuan he Championship huaihawt dan tur chungchang relin, POCSO victim 3-te hi POCSO Act anga an nihna mi dangten an hriat lohna atan (identity protect a nih theihna atan) thil a la hlimchhawn bawk nen, he Championship-ah hi chuan tel tir hrih loh mai ni se, tiin a rel a.
Serchhip District Boxing Association Secretary hnen atangin niminah khan POCSO victim 3 te hi nimin tlai dar 4 ral hma ngeia an khelh theihna tur a hma la tura ngenna leh an ngenna chu a hlawhtling lo a nih chuan Serchhip District atanga Boxer leh Officials kal zawng zawngte vawiinah an hruai haw vek tur thu hriattirna lehkha MIZBA-in a dawng a, MIZBA Office Bearers te chuan nizanah khan he thu hi sawiho nghalin thu tlingah a ngai a, tukin dar 7:30 khan he Championship thlengtu Lunglei District Boxing Association kaihhruaina hruaiah, District hrang hrang Boxing Association hruaitute leh MIZBA hruaitu, he Championship thlienna hmun a awm mekte Emergency Meeting koh ni se tih a ni an ti.
Tukina Emergency Meeting chuan Serchhip District Boxing Association ngenna angin he Championship khelh lai mek hi tha taka zawh a nih theihnan POCSO victim Boxer 3 te hi he Championship a an tel ve remtih sak ni se tiin an rel a. Heng mi 3-te hi Aizawl District, Saitual District leh Serchhip District a awmte an ni a, Serchhip District hming a khelh tumte an ni tih sawiin, MIZBA dan dinglaiin mahni awmna District an chhuah chuan chu mi hminga khelh ngei tur chu a ni, a ti nain, Championship tluang taka khelh theihna tur a nih dawn chuan Serchhip District atanga khelh tir mai pawh he Emergency Meeting hian a remtih sak a, Emergency Meeting thuchhuak chu Serchhip Boxing Association hruaitute hriattir nghal an ni a. Haw lo tur leh Championship khel chhunzawm tur a ngen an ni chungin, Serchhip District atanga Boxer leh Officials kal zawng zawngte chu an haw ta tho tih an tarlang.
MIZBA chuan Mizoram State Boxing Championship 2025 khelh lai mek chu tih tawp lailawk mek a ni a. Mizoram District hrang hrang atanga he Championship khel tura Boxer leh Officials kalkhawmte chuan Mizoram State Sports Council (MSSC) thu leh hla an ngaichang mek tih an lehkhaah chuan an tarlang bawk.