I-League champion pahnih inkhelah Minerva Punjab chuan Aizawl FC chu Rajiv Gandhi Stadium-ah 2-1 in an hneh a, tun season chhunga a vawi khatna atan chak hmel an hmu ve ta.

I-League champion lai Minerva Punjab FC chuan 2018-19 season chhungin chak hmel an la hmu lo a, chutiang bawkin anmahni lo mikhualtu Aizawl FC pawh an la chak bik lo a. Chak thei zawk nih tumin Rajiv Gandhi Stadium, Mualpuiah champion thei team pahnihte hi an inhmachhawn a ni.

Gift Raikhan chuan David Lalrinmuana leh Leonce Dodoz te chu Aizawl FC tan bul tan turin a chhawp chhuak a, hetih lai hian Minerva Punjab technical director Paul Munster pawhin an lak thar Bala Alhassan Dahir leh Donatus Joseph Edafe te a vawi khatna atan a khelhtir ve ve a ni.

Aizawl FC: Gurpreet Singh (GK), Govin Moirangthem, Bektur Talgat, Lalkhawpuimawia, Leonce Dodoz, Kareem Nurain, David Lalrinmuana, Alfred Jaryan, Ghanefo Kromah, Hmingthanmawia, Vanlalduatsanga

Minerva Punjab: Bhaskar Roy (GK), Philip Emeka Njoku, Lancine Toure, Bala Alhassan Dahir, Akashdeep Singh, Souvik Das, Donatus Joseph Edafe, Arashpreet Singh, William Opoku, Amandeep Singh, Moinuddin

Inkhelh tan phat atangin Aizawl FC chuan an nawr phei nghal a, goal thun hmasak pawimawhzia an hre chiang a, chu bakah tun season chhunga chak hmel la hmu lo an nih avangin mahni khelmualah chuan point 3 hlawh chhuah ngei an tum hle.

Minerva Punjab chuan Aizawl chu an lo dang thei zel a, minute 10-ah a vawi khatna atan an nawr let ve a. Dinglam sir atanga ball kal phei chu Aizawl FC goalkeeper Gurpreet Singh chuan a lo tichhuak a, Minerva chuan corner an hlawh a.

William Opoku chuan corner hi a pet a, ball kal phei chu Lancine Toure chuan Aizawl FC defender te kara inzepin goal-ah a lo thun a, mikhual zawk Minerva chu hma a hruaipui nghal der a ni.

Goal luh hnu lawk hian Minerva chuan an nawr phei leh vat a, William Opoku ball vawrh phei chu Moinuddin chuan a thun leh nghal teuh hle a. Opoku leh Moinuddin te hian ball an inpe phei a, Aizawl FC goal-ah chuan an thun leh a, mahse offside vangin an pawm ta lo thung.

Aizawl game a zuai chho a, an khel a fuh thei lo hle a. Leonce Dodoz chuan Minerva box chhungah Bektur Talgat chu ball tha deuh mai a pe a, mahse Arashpreet Singh chuan a lo tibuai hman a, minute 23-a Kyrgyztani player in Aizawl si phurh a sut theihna hun chu a rawn dang hlauh a ni.

Half time dawnah Philip Emeka chuan goal thun theihna hun tha a nei a, mahse Aizawl goal lama a ball pet chu an lo dang per a. Toure pawh chuan goal thun belh a tum a, mahse hei pawh an lo dansak leh a, half time thlengin Minerva hian 1-0 in hma an hruai chhunzawm a ni.

Second half an khel leh a, a thlengtu Aizawl game chu tlem chuan a rawn ziaawm ve leh tan a, mahse an si phurh erawh an sut thei mai si lo.

Minute 58-ah Minerva Punjab chuan corner an hlawh a, hei hi William Opoku chuan a pet leh a. A hma ang deuh bawkin ball kal phei chu Lancine Toure bawk chuan Aizawl FC goal-ah a lo tauh lut leh a, mikhual team chuan 2-0 in hma an hruai theih phah a.

Minute 83-ah Akashdeep Singh chuan Minerva box chhungah a kutin ball a lo khawih fuh a, Aizawl FC chuan penalty an hlawh phah hlauh mai a. Penalty hi Leonce Dodoz chuan petin Minerva goalkeeper Bhaskar Roy man phak lohah a pet a, Aizawl si phurh pakhat chu a sut a.

Hemi hnu hian goal dang a luh belh ta lo a, champion lai Minerva Punjab chuan 2-1 in Aizawl FC an hneh a ni.