Tun nipui bazara striker HOT ber chu Viktor Gyokeres hi a ni kan ti thei awm e, Manchester United nen nasa taka sawi zawm ni mah se, Arsenal chuan an chang dawn ta niin a lang.

Arsenal hian Gyokeres hi kum 5 chhung atan contract an zawrh a, hei hi Sweden international hian a pawm tawh niin media te chuan an tarlang.

Mimal thilah chuan harsatna a awm tawh lo niin The Athletic chuan a tarlang bawk a, hetih lai hian kum 27 mi man chungchangah erawh Sporting CP leh Arsenal te an la inrem chiah lo deuh.

Arsenal chuan Sporting CP hi ngawrh takin Pathianni khan an dawr ta a, Portuguese club-in a man an chhiar zat  €80 million (£69.1m) chu London Club hian an pe thei dawn niin media te chuan an tarlang mek bawk.

Sporting chuan Gyokeres hi chawlh an pe rei deuh hret a, pre-season pawh zawm tlai turin an hriattir tawh nghe nghe.

Season liamta khan Gyokeres hian Sporting CP tan game 52 atangin goal 54 lai a khung a, Portuguese League leh Cup a chawipui a ni.

Kum 2023 khan Gyokeres hian Coventry City atangin Sporting hi a zawm a, Portuguese club tan game 102 atangin goal 97 lai a khung tawh.