AC Milan chuan Chelsea forward Christopher Nkunku lak tumin hma an la mek a, club pahnih te hian inbiakna an nei mek niin James Horncastle chuan a tarlang.
Nkunku hi Bayern Munich leh a club hlui RB Leipzig te pawhin an ngaihven a, Premier League ṭhenkhat pawhin an ngaihven bawk a ni.
Chelsea forward hian tun nipui bazarah hian Stamford Bridge a chhuahsan a rinawm hle a, Enzo Maresca chuan Premier League-a an game hmasa pahnihah a khelhtir ve lo a, Nicolas Jackson nen hralh an tum thu a sawi chhuak a nih kha.
Chelsea hian Nkunku hi hralh an duh a, loan-a hawhtir lam an rilruk lo a ni. Milan hian forward lam an melh mek a, Bayer Leverkusen aṭangin Victor Boniface lak an han tum a, mahse medical a paltlang ta si lo.
Italian club hian Sporting aṭangin Conrad Harder lak tumin hma la leh mah se, Sporting lam hian a thlakna tur an dap hman tawh dawn loh avangin Conrad Harder hi hralh an phal ta lo.
Club World Cup khelh laia inhliam Jamal Musiala a chawlh rei deuh dawn avangin Bayern Munich khan Nkunku hi an han ngaihven viau a, mahse indawrna tak tak erawh a awm ta lem lo.
A club hlui RB Leipzig chuan Nkunku hi lak kir leh dan an ngaihtuah a, Chelsea khan pre-contract an ziahpui hnuah kum 2023 khan €60million-in an lei a, hetih lai hian hliamin a tlakbuak chho ve reng a, Chelsea tan a inlan tam thei ta lo a ni.
Nkunku hi Germany, England leh Italy aṭangin ngaihventu an awm nual a, Chelsea chuan Janaury thla khan an hralh dawn a nih chuan €50million (£43.2million; $58.2m) vel an chhiar a nih kha.
Tun nipui bazarah Chelsea chuan hmatawng Joao Pedro leh Liam Delap te an la a, Jackson leh Nkunku te tan hmun a awm ta lo a, anni pahnih hi thehchhuah an tum mek. Nicolas Jackson chungchang Bayern Munich leh Chelsea te chuan inremna an nei tawh niin The Athletic chuan a tarlang a, FC Bayern hian loan-in an hawh dawn a ni.
Nkunku hian Chelsea tan competition hrang hrangah game 43 a khel tawh a, goal 14 a khung ve tawh bawk. Premier League-ah erawh vawi 9 chiah inkhelh bul a ṭan a, Club World Cup-ah erawh game 6 a khel ve a, goal 1 a khung ve a ni.
RB Leipzig tana a khelh laiin Nkunku a che ropui hle. German club tan game 172 aṭangin goal 70 a khung a, assist vawi 56 lai a nei bawk. 2022-23 season khan top scorer a ni a, DFB-Pokal pawh vawi 2 a chawi tawh bawk a ni.