Cristiano Ronaldo chuan Real Madrid supporter zingah a chet dan duh tawk lo leh a chunga lawm lo an awm nual thu a hriat avangin,"Pathian meuh pawhin mi zawng zawng a ti lawm kim thei bik lo," tiin El Mundo a hrilh.
Tun season kal mekah Real Madrid tan competition hrang hrangah Ronaldo hian goal 25 lai khung tling mahse Real Madrid chet that loh chhanah amah chu fans tam tak chuan an la ngai thova, hemi chungchang hi Ronaldo chuan El Mundo chanchinbu hnenah a sawi chhuak a.
"Mi tu pawhin khel tura min duh dan chu an nei vek ang. Heng mipuite ngaihdan avang hian zan ka muthilh theih loh phah ngai lo. Anni duhdan leh ngaihdan zawng zawng kan ngaihtuaha tih hlawhtlin kan tum chuan nun ngaihna a awm dawn lo a ni. Pathian meuh pawhin mi zawng zawng a tilawm kim thei bik lo a nih hi.
"Mual chhunga ka chet dan hi ruatlawk engmah a awm lo, chak loh ka duh ngai lova, Football-a ka hlawhchhuah zawng zawngte hi keimah ka nih avanga hlawhchhuak ka ni a, ka nungchang ka thlak thei lo, mahse hmasawn turin min duh a nih chuan ka pawm ang, hetih lai hian mi thar hlak ni tur chuan a ngaihna a awm lo a ni.
"Mi engemaw zatin min hmangaih a, chutih laiin mi engemaw zatin min hua a, chapo leh inngaihluah min ngai a ni," tiin Ronaldo a sawi.