Pep Guardiola cardigan hak nasat deuh mai chu midangte tanpuina tur sum tuak nan an lilam a, man to deuhin an hralh.

Manchester City manager Pep Guardiola cardigan hak ngun em em, ‘coatigan’ an tih mai chu an lilam a, £6,000 (Rs. 5,26,149) zetin an hralh a. An hralhna pawisa hi an club in charity foundation an neihah an chhung lut ang.

Kum 48-a upa Guardiola chuan thla hmasaa FA Cup final-a Watford an hneh tum khan a cardigan chu lilam atan pek a tum thu hi a lo sawi lang tawh a. Lilam tura a pek hnu hun remchang hmasa berah an lilam a, rin aiin an lo ngam huai hle a ni.

Cardigan lilam hi chhangtu an awm ve teuh a, Manchester City tantu, USA a cheng, James Hodge chuan a tawpah a lei thei ta a. Manchester City in Manchester khawpuia mi harsa an chhawmdawlna atan cardigan hralhna pawisa hi hman a ni ang.

Guardiola chuan, “Tluang taka lilamna hun kan hmang thei hi lawmawm ka ti khawp mai a. Hetiang zat pawisa a lut thei hi a ropui ka ti a, he huna rawn pen chhuak zawng zawngte chungah lawmthu ka sawi a ni,” a ti.

Community lama an hotupa Mike Green, Head of City chuan, “Pep Guardiola cardigan lilam tur a ni tih an hriatin ngaihventu an thahnem khawp mai a. Community huang chhunga City tan heti zat pawisa a tling khawm thei hi lawmawm kan ti hle a ni,” a ti.

An thil lilam tak, Pep Guardiola cardigan hi thla hmasa khan a hlutna an sawi lang tawh a, Theresa May-i designer duh ber, Italian designer Herno siam niin, £1,200 (Rs. 1,05,229.8) man vel bawr a ni.

Spaniard coach Guardiola chuan kha cardigan khan season liam taah khan vawi 30 vel chu a ha a ni.