Lionel Messi leh Cristiano Ronaldo hian football an khelh dun chhung chu khaikhin an ni reng tawh dawn. Club tana an chet dan kan tarlang ngun a, tun tum chu ram tana an chet dan thlir teh ang.
Tunah hian Lionel Messi hi kum 30 a ni mek a, ani aiin Cristiano Ronaldo hi kum hnihin a upa. An upat zawng atanga chhut chuan Ronaldo hi ram tan a khel hnem dawn tih a hriat sa a, game an khelh dan atanga chhutin an goal khung dan te thlir ila.
Kumin hian World Cup 2018 qualifying khelh a ni a, Portugal chu qualify turin dinhmun tha takah an ding mek, hetih lai hian Argentina erawh CONMEBOL atangin an qualify dawn nge dawn lo tih a hriat loh. Play-off khel thei dinhmunah an ding mek a, game thum chiah khelh tur a awm tawh, an hnuaiah hian Chile leh Paraguay an la awm bawk nen, an qualify chu beisei mah ila chiang tak chuan sawi erawh a har khawp mai.
Kumin chhungin Ronaldo hian Portugal tan game 9 khelin goal 10 a khung a, assist vawi 4 a nei. Messi chuan game thum khelin goal khat a khung a, assist a la nei lo. Nikum khan Ronaldo chuan game 13-ah goal 13 a khung a, assist vawi 3 a nei. Messi chuan game 11-ah goal 8 a khung a, assist vawi 6 a nei.
Kum 2015 khan Ronaldo chuan game 5 khelin goal 3 a khung a, assist a nei lo. Messi erawh game 8 khelin goal 4 a khung a, assist vawi 3 a nei. Kum 2014 khan Ronaldo chuan game 9-ah goal 5 a khung a, assist vawi khat a nei a, Messi chuan game 14-ah goal 8 a khung a, assist vawi 3 a nei.
International game an khelh tawh zawng zawng atanga chhut chuan Ronaldo goal khung khung a tam zawk a. Game khel hnem zawk pawh nise average-a lak chuan Ronaldo a sang zawk. Ronaldo hian international game 145 a khel tawh a, goal 78 a khung tawh, Messi hian International game 118 khel tawhin goal 58 a khung a, an game khelh zat ve ve atanga chhut chuan Ronaldo dinhmun a tha zawk a ni. Assist erawh Messi-a'n a nei hnem zawk a, Messi hian assist vawi 37 a neih laiin Ronaldo erawh chuan assist vawi 27 a nei.
Club tan trophy an chawi nual ve ve, Ballon d'Or hi Messi hian vawi 5 a dawng tawh a, Ronaldo hian vawi 4 a dawng tawh, kumin hian Ronaldo chu Ballon d'Or dawng tura rinkai ber a ni a, kumin a ral chuan vawi 5 ve ve an dawng ngei dawn niin a lang. Ram tan erawh senior level-ah Ronaldo hian Euro a chawi tawh a, Messi erawh chuan trophy lian a la chawi lo a ni.
Team that zawngah chuan Portugal team leh Argentina team chu khaikhin rual a ni lo. Argentina team-ah chuan khawvela player tha ber ber an awm khawm a, Portugal-ah erawh tha fal tia sawi tur an tam lem lo. Chuta tanga chhut chuan Portugal tana Ronaldo thawhrah hi a ropui tak zet a ni. World Cup 2018-ah hian Argentina an qualify lo a nih chuan Messi hian World Cup leh hi a khel thei tawh kher angem? 2018 World Cup hi Ronaldo tan chuan a World Cup khelh hnuhnung ber a ni tawh ngei dawn niin a lang bawk, Messi hian a khel a nih chuan ani tan pawh a World Cup hnuhnung ber a ni thei tawh maithei bawk a ni.
Anni pahnih hi khawvelin a tehna chu goal an khung hnem leh hnem loh atangin a ni a. Engatinge Messi hian Barcelona tan goal a khung pup pup laia ram tana a khung tam theih loh? Tih zawhna a awm thin. Argentina hian forward an nei tha em em, Messi hi Barcelona-ah chuan foward-ah khel thin mahse ram tan erawh number 10 role a play thin a, hei hi ram tan goal a khung tam theih lohna chhan pakhat niin a lang.
Tunge tha zawk? Tunge thiam zawk? Tih zawhna hi chu mimal tinin chhanna kan nei vek, Messi tan tute chuan a chet that loh lai ber pawhin Messi an thlang ber a, chutiang bawkin Ronaldo tantute pawhin a chet that loh lai ber pawhin Ronaldo an thlang reng bawk. Ram tana an thawh hlawk dan atanga chhut chuan tun dinhmunah chuan Messi aiin Ronaldo a chungnung zawk tih stats leh trophy atangin a hriat theih a ni.