Barcelona striker Robert Lewandowski chuan Lionel Messi nena khelh dun chu a duhthusam a nih thu a sawi.

Nipui lo awm tura PSG-a a contract a tawp hunah Messi hi Barcelona-ah a kir leh  beisei a ni deuh a.

"Messi hian Striker ball pass a thiam takzet a ni," tiin Lewandowski chuan Spanish outlet Marca-in an kawmnaah a sawi.

Poland chhuanvawr Lewandowski leh Argentina captain Messi hi World Cup-ah an inhmachhawn dawn a. Group C-ah Saudi Arabia leh Mexico-te nen an awm ho.

Lewandowski chuan,"Messi chungchang sawi chuan Striker-te nena an inzawmna hi a tha thei em em a, box leh line chhunga ball khalh luhah chuan amah aia tha khawvelah an awm lo. 

"Engtin nge a hun a hman zel dawn tih erawh tuman kan hre lo, striker tan chuan Messi nena khelh chu duhthusam a ni,"tiin a sawi.

Bracelona president Joan Laporta-a'n,"Leo hian Barcelona hi a in a la ni reng tih a hria lawm," tih thu a sawi atanga ni rei lotea Polish striker hian Messi nena khelh dun a chak thu a rawn sawii chhuak ve zui nghal zat a. Hetih lai hian Barcelona-a Messi lak kir leh tumna erawh hmalakna a awm nge awm lo tih sawi chian theih a la ni lo thung.

He kum 60 mi hian,"Nipuia kan ruahman lawkte hmaih nei lovin kan hlen thei vek a. Season hmasa aia team tawhkhirh kan la nei dawn. Kan hmasawn dan tur hi kan ngaihtuah reng a, an inhliam neuh neuh avangin team theihna hmuh a harsa," tiin tun season kal meka Barcelona chet dan chungchang a sawi.

Kum 2021 khan Messi hian Barcelona chhuahsanin Paris Saint-Germain-ah kum 2 chhung atan contract a sign a. Vawi 7 lai Ballon d'Or lo dawng tawhtu hi tun season kal mekah club domestic league leh Champions league-ah game 18 atangin goal 11 a khung tawh bakah assist vawi 14 a nei tling tawh bawk.