Sevilla winger, Argentina lama Lionel Messi-a team mate ni bawk Lucas Ocampos chuan Messi chu football chanchina mi ropui ber ni mahse mi chapo lo tak leh mi inngaitlawm tak a nih thu a sawi.

Messi hian kum 2004 khan kum 17 mi niin Barcelona tana a game hmasa ber a khel a, kum 17 professional football khel tawhin, mi tam takin Ocampos-a ngaihdan hi tawmpuiin, Messi hi footballer piang tawh zinga mi ropui berah an dah.

Messi hi football-a mimal inchawimawina ngaih hlut bera chhal ngam Ballon d’Or vawi ruk dawng thei awmchhun a ni a, Barcelona tana goal khung hnem ber ni bawkin, a trophy chawi theih ang chu chawi loh a nei lo tih theih a ni.

Kum 27 mi Ocampos chuan Messi-a chungchang zawhna chhangin, “Leo hi mi naran ve mai a ni a, TV leh khelmual chhunga in hmuh ang chiah hi a ni mai. A bula kan awm hi chuan mi pangngai angin kan inhmu vek mai a, football chanchina ropui ber ni mahse mi chapo lo tak leh mi inngaitlawm tak a ni a, a simple em em bawk a ni,” a ti.

Sawi zelin, “Barcelona-ah a awm ta lo mai hi ngaihtuah thiam a la harsa hle a, amah hmachhawn zawngin ka khel thei tawh lo. A tha ber kan hmachhawn hi chuan kan thatna lai ber phawrhchhuahin a awm thinin ka hria a, La Liga-ah Leo kan nei ta lo hi a pawi ka ti hle a ni,” a ti bawk.