Emirates Stadium-ah Barcelona chuan Messi goal hnih hmangin si hnih faiin mual neitu Arsenal an hneh a, away goal hnih Barca hian an neih tak avangin Champions League quarter final lut turin chance an nei tha hle a ni.
Messi hian Arsenal lamah goal lo khung tawh thin mahse Emirates Stadium-ah erawh goal a la khung lo. UCL last 16 first leg-ah erawh hnuhma pawimawh tak a hnutchhiah ta a. Messi hian tun season-ah Barcelona tan goal 29 a khung ta a, Champions League goal 82 a khung tlin bakah Arsenal mualah goal a khung ve ta a. Tin, Messi hian Arsenal a hmachhawn vawi 4-ah goal 8 a khung ta bawk a ni.
Team hnihte hi Champions League-ah vawi 6 an inhmachhawn tawh a, Arsenal home-ah vawi thum inkhel tawhin Barcelona hian hnehna a vawi khat nan an chang a. Team hnihte hi Champions League-ah vawi 6 inhmachhawn tawhin, Barcelona-in vawi 4 hnehna an chang a, Arsenal-in vawi khat hnehna an chang a, vawi khat erawh an inhnehtawk a ni.
Arsenal 0-2 Barcelona
Messi 71', 83' pen
PLAYER RATINGS (data source : opta)
ARSENAL: Čech 8, Bellerin 6, Mertesacker 6, Koscielny 6, Monreal 7, Coquelin 6, Ramsey 6; Oxlade-Chamberlain 6, Özil 5, Sanchez 6; Giroud 5.
Subs: Walcott 6, Welbeck 6, Flamini 4.
BARCELONA: Ter Stegen 7, Alves 7, Piqué 6, Mascherano 7, Alba 6, Busquets 7, Rakitic 7, Iniesta 7, Neymar 7, Suárez 7, Messi 8.
Goal hnihte hi second half-a lut ve ve a ni a, goal hmasa zawk hi 71 mins-a lut niin, Barcelona chuan counter attack atangin goal an khung a, Neymar chuan Suarez-a tan halfway line-ah ball a pe, Neymar chu chak takin a tlan lut a, Suarez chuan Neymar-a tan ball pe lehin, Neymar chuan chak takin box chhungah a tlan luh pui a, tuma chan loh Lionel Messi-a tan pe lehin, Messi tan chuan bel chhunga sa a ni, pet nghal lo chuan a'n nghak leh te te a, chiang zetin a chhuih lut ta a ni.
Hun tawp dawn minute 8 la awmin Wenger chuan Coquelin aiah Flamini a dah lut, Flamini-a'n a tih hmasak ber chu box chhungah Messi pet tluin penalty a chawi. He penalty hi Messi chuan petin, Cech-a dinglamah chiang takin a pet goal a, si hnih faiin Barcelona chuan hnehna an chang ta a ni.
Arsenal hian first half-ah goal hlauhawm vawi hnih an nei a, hnai set sawt atanga Chamberlain-a pet chu Barca goalkeeper Ter Stegen chuan a lo dang a, hemi hma chiah hian Bellerin-a pet Alves-a'n a lo dang bawk. Tin, second half tir lamah Giroud-a chuan a tauh goal teuh hle a, Ter Stegen chuan a kut dinglamin a lo beng per hman a ni.
First half tir lamah Arsenal-in Barca hmatawng an dang thei hle a, mahse darkar chanve an khel tling vel tih atangin Barcelona chuan Arsenal defence line an thiat tan. Second half tir lam atangin Barca chuan an nawr nghal bawk a, Neymar chuan goal khungna chance tha zet nei mahse Cech chuan a lo dang a.
Messi chu Barcelona key player a ni chiang hle a, a siam pahnih kha Neymar leh Suarez te khan khung thei ni mahse an hlah ve ve a, hun tawp dawn tak takah Neymar-a chuan a tauh goal teuh hle a, Cech chuan Neymar-a tauh hi a lo dang a ni.
Inkhelh pumpui thlirin Barcelona an chungnung zawk a, goal dang pawh khung theihna chance an nei nual. Away-ah si hnih faiin Barca an chak a, quarter final lut turin dinhmun tha takah an ding mek a ni.