Kum 2022 World Cup-ah hian kum naupang atanga upa lam thlengin team tana tha tak taka rawn che kan hmu a, Kum upa lam tawh sawisel boa rawn che zinga langsar ber Lionel Messi hian a team-te final a hruai thleng.

He 35 mi Qatar World Cup-a a rawn che tha lutuk hian sport than danglam tawh zia a entir niin Arsenal manager hlui Arsene Wegner chuan a sawi.

Kum 37 mi Luka Modric chu Croatia tana ralthuam pawimawh taka rawn tanginb a ram chu semi-final lai a rawn hruai thleng a, pathumna an ni. Oliver Giroud pawhin Les Bleus tana goal khung hnem ber Thierry Henry-a record rawn khumin, kum 35-ah France World Cup final a hruai thleng bawk.

A kum naupang lamah kum 19 leka upa Jude Bellingham chu England tana player langsar ber pawl rawn niin quarter final lai an thleng a. Kum 23 mi lek Kylian Mbappe pawh France tana dinhmun pawimawh ber luahin, World Cup vawi 2 chawi thei dinhmunah a ding mek bawk.
Wenger chuan sport-in hma a sawn chak zia leh thiamna sang chho zelin an eizawnna kawnga a puih nasat theih zia he World Cup-ah hian a lan thu a sawi.

“Kum 2006 khan Champions League final-ah Arsenal ka hruai thleng a, khatah khan Messi pawhin a khel daih tawh. Tunah kum 16 hnuah pawh a la khel mai ni lovin a langsar ber a la ni thei a. He tournament hian sport than danglam tawh zia a ti lang chiang hlein ka hria.

“Hma taka top level sport rawn khel theite pawh kan hmu nual a, an daih rei tulh tulh dawn lenghal. Kum 35 mi ni chunga sel tur awm loa khel thei hi kan la hmelhriat ngai lo a, tun tumah erawh Messi leh Giroud kan nei. Modric pawh kum 37 niin a khel a la chhe chuang lo.

“An hriselna leh hmakhua piah lamah an that chhung pawh hi a rei tawh. Bul an tan hma a, an chuai har bawk," tiin press conference-ah Wegner chuan a sawi.

Zaninah Final-ah hian Argentina an chak ang em? Argentina ro hlu hian football-a lawmman sang ber hi a  chawi theih Klinsmann chuan a ring.

“Tu pawhin Messi hian tha takin khel se kan duh vek. Tournament hmaa kan lo rin lawk ang chiahin a rawn khel. World Cup champion ni turin kan duh theuh. 

“Messi leh Ronaldo tan hun hnuhnung a ni tih kan hria a, kum 15 kalta chhung khan khawvel hriat thamin an khel, “tiin Klinsmann chuan a sawi a.

Mbappe pawh Ronaldo leh Messi lal lukhum rochun thei dinhmuna a din thu a sawi tel bawk.

“Superstar-te hun hnuhnung lam kan sawi mek lai hian an hnung rawn zui thei pawh an awm a, Mbappe hi a kum ngaihtuah hian a rawn ni thei. Player naupang tak tak tha tak taka an rawn khel ka hmuh hian mak ka ti zawk, "tiin Klinsmann chuan a sawi a.