Lionel Messi chu kerek hliam avangin a chawlh rei a ngaih tur thu leh MLS regular season tawp lamah chauh a inlan theih tur thu Tata Martino chuan a sawi.

July ni 14 khan Copa America final-ah Colombia an hmachhawn a, kha mi tum khan kum 37 mi Messi chuan a kerek a tihliam palh hlauh mai a, a la chawl vang vang rih a ni.

"Messi-a lo kir hun tur hi sawi lawk theih a ni lo, a hliam a dam a, amah pawhin inkhelh a duh hunah leh, training tha taka a zawm leh hunah chauh a lo kir ang. MLS regular season game hnuhnung 9-ah chuan a rawn inlan hman rin a ni," tiin Martino chuan a sawi.

September thlaa South American qualifying match-ah pawh Lionel Scaloni chuan Messi hi a telh lo a, Argentina hian Colombia leh Chile an hmachhawn dawn a ni.

"Messi chuan hma a sawn chho lutuk, mahse inkhel turin a la inpeih lo a, Argentina team-ah pawh koh a ni lo a ni," tiin Martino chuan a sawi bawk.

Messi a tel theih loh chhungin Inter Miami chu MLS Eastern Conference standings-ah a chung berah an awm mek a, FC Cincinnati lakah point 5-in an fal mek bawk.

Kumin chhungin Messi hian Inter Miami match 33-ah game 18 a hmaih ta a ni.