Lionel Messi-a'n Barcelona a chhuahsan dawn khan Inter-a lut tura inbiakna an kalpui thu Javier Zanetti chuan a sawi chhuak.

La Liga title 10 leh Champions League trophy 4 a chawipui hnuin Messi chuan kum 2021 khan Barca a chhuahsan a, Ligue 1 lam Paris Saint-Germain a pan ta a nih kha.

Argentina-a Messi-a team-mate hlui leh tuna Inter vice-president ni ta Zanetti chuan PSG a pan hma khan Serie A vawi 19 lo champion tawh Inter lam hi a pan tep niin a sawi.

Zanetti chuan an sum dinhmun chu Messi-a'n hmun dang a pan chhan berah a ngai.

"Barcelona a chhuahsan khan mak ka ti a, dik tak chuan PSG leh Premier League club kha kan el pha ngang lo a ni. 

"Kan inlaichinna ngaihtuah chuan kan lam a rawn pan theihna chance kha a awm reng," tiin Zanetti chuan DAZN a hrilh.

Messi chuan PSG chu Ligue 1 title a lakpui a, football trophy hlu ber World Cup no mawi pawh a chawi tawh bawk.

Season hnuhnung berah Milan lak atanga point 2 leka title an humhim theih loh hnuin, Nerazzuri chuan point 13-in hmahruaitu Napoli chu tun season-ah an um pha lo mek, Luciano Spalletti-a team-te hian top-flight game 21 an khelhah vawi 18 hnehna changin, insum an tum lem lo hle.

"League-ah hian tun aia ti tha tur hi chu kan ni mawle, mahse point kan hloh nual. Fixture list tawt lutuk vang hian tihsual chu a awm lo thei lo, mahse ka team-teah theihtawp chhuah tumna ka hmu tho.

"Harsatna hmachhawn dan pawh kan thiam a, sawiselna neuh neuh kan dawn pawh kan hre zeuh zeuh," tiin Zanetti chuan tun season-a an chet that vak loh chungchang a sawi a ni.