Paris Saint-Germain forward Lionel Messi chuan, Paris khawpui chhuahsana a club hlui Barcelona a zawm leh a rinawm telh telh niin 90min chuan a tarlang.

Messi hian tun season daih bak PSG-ah contract a nei tawh lova, PSG hian contract thar ziahpui an tum mek a, mahse inremna an nei thei dawn em tih sawi theih a la ni lo.

Kum 2021 khan kum 21 zet a lo awm tawhna Barcelona chu Messi hian a chhuahsana, PSG-ah input lutin, mahse a club hluiah bawk hian a kir leh a rinawm chho hle niin chanchinbu te tarlan dan atangin a lang.

PSG hian Messi hi chelh theih an inbeisei viau a, mahse Barcelona pawhin Messi hi an beisei ve reng bawka, season tharah Messi hi Barcelona-ah bawk kan hmu leh lovang tih a sawi theih hauh loh.

World Cup-a Messi-a’n Argentina a champion pui zawh khan, PSG chuan Argentina captain hi contract thar ziahpui theih thuai an inbeisei hle nia sawi a ni a, mahse an beisei angin thil a kal lova, an tum aia rei contract thar chungchangah an indawr tawh nia sawi a ni.

Kum 35 mi hi Barcelona bakah hian Saudi Arabian club Al Ittihad chuan hlawh tam tak hlawh turin an thlem mek bawka, David Beckham-a club Inter Miami pawhin Messi hi an bia niin chanchinbu mite chuan an tarlang.

Sum tam tak hmanga thlemtu nei mah se, Messi hi a hmangaih hmasa Barcelona-a bawk a kir leh a rinawm ta ber a, Barcelona hian an lakluh a rinawm chho telh telh tih report a ni.

PSG pawh hi Messi-a chhuah tak thut atan an inbuatsaih tan niin a lang a, Messi hi nipuiah an chan a nih chuan AC Milan forward Rafael Leao lakluh an tum dawn niin chanchinbu thenkhat chuan an tarlang.