Saudi Arabia lakah chesual mah se Argentina chuan chetsual nawn an tum tawh lo, game hmasa bera an chak loh hnuin hnehna an chang chho ta vek mai.

Pathianni zan khan 2022 Qatar World Cup Round of 16 match-ah Argentina chuan 2-1 in Australia an hneh a, quarter final an inpet kai ta, quarter final-ah hian 3-1 a USA hnehtu Netherlands an hmachhawn ang.

Australia an hneh tum hian Lionel Messi chuan goal hmahruai a khung, second half-ah Alvarez chuan goal a khung ve leh bawk. Messi a khel tha leh pek hle a, professional career-a game 1000 a khelhnaah hian man of the match atana thlan a ni a.

Goal mawi tak a khung bakah chance hlauhawm tak tak a siam nual. Lautaro Martinez khan pet goal ngat selang chuan Messi hian assist vawi hnih emaw vel chu a neih ngei a rinawm. Messi hian World Cup-ah man of the match lawmman vawi 8 a dawng ta a, ani aia he lawmman dawng hnem hi an awm lo.

Inkhel zawhah Argentina player tangkai Mac Allister chuan, "Leo hian amaha chakna awm hi a rawn phochhuak thin a, hetiang game-ah hi chuan tha lehzualin a inlan thin. Kan tan chuan player pawimawh ber a ni a, chu chu hriain ani pawhin nasa takin midang a pui bawk. A kianga kan khel thei hi kan inchhuang hle a ni.

"Theihtawp chhuah a duh thin tih kan hria, han inbakkaih ve thin mah se a game-ah danglamna a awm chuang lo a, a hma aiin a khel tha zual sauh zawk thin," tiin a sawi.

Australia an hmachhawn tum khan Messi hian vawi 6 lai shot a nei a, chance tha tak tak vawi 4 a siam bawk. 

Mac Allister chuan Messi a fak chhunzawm zel, "Messi kianga khelh hi nuam ka ti. Ka tan chuan Khawvela player tha ber a ni, football history-ah pawh. A kianga ka khel thei hi ka inchhuang tak zet a ni.

"Ball a chan tawh hi chuan engkim hi a awlsam phah vek thin. A tan World Cup nuam tak niin ka hria, kan mamawh chhanna a ni e," tiin Mac Allister chuan a sawi bawk.