Kylian Mbappe-a chanchin a ngaihnawm chho zel dawn e. Ligue 1 champions Paris Saint-Germain chuan pre-season tour Japan leh South Korea-ah neiin, inrinni khan Paris khawpui atangin an thlawk chhuak. PSG pre-season tour squad-ah hian Mbappe a tel ve ta lo.
Tun nipui bazar inhawn hma chiah khan French striker hian kum khat dang atana contract chhunzawm a tum tawh loh thu, PSG hotute hnenah ziakin a thlen a nih kha. Kar hmasa Thawhlehni khan PSG president Al-Khelaifi chuan player te hmaah thu rorum tak a sawi a, PSG chhuahsan duh an awm chhuan chhuak mai turin a ti.
"Tun tum hi English leh French-a ka thusawi hnuhnung ber tur a ni tawh ang. In hnena ka thusawi in hre duh a nih chuan, French tawng in thiam mai a ngai ang.
"Kan club badge hi in zah tur a ni a, hei hi in inkhelh chhan tur a ni. Hemi hmuna in awm duh lo a nih chuan, PSG hi in chhuahsan nghal thei ang.
"Kan hun min khawhral tir suh u, in pualin training ground tha tak, 250 million pound man vel kan buatsaih a. He training ground thar hi khawvelah pawh a tha ber a ni hial ang.
"Hlawhtling turin in mamawh zawng zawng kan pe che u a, chhuanlam a awm tur a ni lo. Hei hi PSG thar chu a ni e.
"Luis Enrique hi in boss a ni a, team chhunga a thutlukna siam chu thutlukna tawp a ni. Ka office-ah lo kalin, manager in duhkhawp lohna emaw chungchang in rawn sawi tur a ni lo. Tun atang chuan ani hi boss a ni e," tiin Al-Khelaifi chuan PSG player te hmaah thu a sawi.
Mbappe chu July ni 31 hmaa a hma hun chingfel turin an ti a, July thla tawp a ni chho mek a, PSG-a contract thar ziah a tum tawh lo tih a lang chiang chho zel. Hei vang hian PSG chuan tun nipui bazar inhawn lai ngeia hralh an tum dawn ta a ni.
Mbappe hian 2023-24 season chu PSG-a cham chu a la tum tho. Real Madrid pan a duh tih a chiang a. Tun nipui bazar inhawn lai hi chuan Real Madrid lamin an lak theih a rinawm loh.
Spanish club hian sum lamah harsatna an tawk ve tho, PSG-a kum khat chiah contract nei tawh Mbappe hi to taka lei an ngam lo. Hetih lai hian nakkum lawkah free agent a ni thei mai dawn a, chumi hun nghah chu Real Madrid tan a finthlak dawn.
PSG hian Mbappe hi a thlawna chhuahtir an tum lo bur, a manah £160 tal, a tlawm berah an phut dawn nia report a ni a. Hetiang zata lei thei tur club chu an awm tho ang, mahse amah Mbappe hian chhuah a duh miau loh chuan, PSG tan tih theih a awm dawn lo a ni.
Kar khat chhungin Mbappe hian £2 million vel a hlawh nia report a ni a, season khat chhung hlawh tam tak a la nei thei dawn a. Tin, 2023-24 season hi PSG-ah a cham leh a nih chuan, Loyalty bonus £170 million vel a la dawng thei dawn bawk a.
Tin, nakkuma free transfer-a Real Madrid a pan a nih chuan, transfer fee a awm dawn si lo, Real Madrid-ah hlawh tam tak a la chhunzawm thei dawn tihna a ni bawk a. Mbappe-a tan chuan sum to sum hi a ni ringawt dawn a ni.
PSG lam hian engtin nge an tih dawn? Player-in chhuah a duh miau loh chuan, an hralh thei mai bik si lo a. PSG hian zuar mah se, A club pan duhin an dawr lo a nih chuan Paris Saint-Germain forward Kylian Mbappe chuan season tluana bench-a thut a pawi ti lo niin Sky Sports chuan a tarlang.
Hei pawh hi thil thleng thei a ni ve chiang mai. Real Madrid-in tun nipui bazara an dawr si loh chuan, a man chhiar eng ang pawh ni se, Mbappe a chhuah duh miau loh chuan, PSG tan tih theih a awm dawn lo.
Mbappe hi PSG hian season tluanin inkhel lovin an dah mai mai thei a, a chan chhe zawk tur chu PSG an ni dawn tho tho. Chuvang chuan Paris club hian French forward hi an hralh duh a nih chuan, a man an chhiar hniam deuh fe a ngai dawn niin a lang.
Saudi Pro League club lam pawhin Mbappe hi an ngaihven nia report a ni a, English club zingah Arsenal chu Mbappe nena sawi zawm an ni ve mek bawk. French forward chungchang hi Mikel Arteta zawh a ni a, Arsenal boss Arteta chuan, "Kan team-a awm lo player-te chungchang sawi ka duh lo tih in hriat kha," tiin chanchinbumite a chhang.
Tun kar chho hi chuan Mbappe leh club hrang hrang sawi zawm an ni chho dawn, hetih lai hian Pep Guardiola chuan Mbappe chungchang hi a hrechiang khawp mai. Manchester City-in lak an tum leh tum loh an zawh tumin Spanish manager chuan, "Tu pawhin Mbappe-a pan duh club chu an hria alawm," tiin a chhang a nih kha.
Real Madrid a pan theihna tur a nih dawn phawt chuan Mbappe hian eng pawh tih a huam dawn niin a lang a. Club dang chungchang media ten tarlang mah se, Real Madrid lo chu Mbappe hian a pan a rinawm loh a ni.