Tun season Champions League-a an game hmasa berah Real Madrid chuan 2-1 in Marseille an hneh a, kim loin khel mah se Mbappe goal hnih chu Real Madrid chaknan a tawk a ni.
Trent Alexander-Arnold chu inkhelh tan atanga minute 5-na lekah hamstring hliam avangin lak chhuah a ni a, Dani Carvajal chuan thlakin, Real Madrid captain hi hun tawp lamah hnawhchhuah a ni a, Marseille goalkeeper Geronimo Rulli a tauh avangin referee Iraran Peljto chuan direct red card a hmuh a ni.
Kim loin khel mah se European Champion vawi 15 ni tawh Real Madrid chu Mbappe penalty goal hnih hmangin hnehna an chang ta tho a, he match-ah hian Los Blancos hi an chungnung hle a, shots vawi 28 lai an nei a, shots on target vawi 15 neiin, an khingpui lam hian shots on target vawi 5 an nei ve a ni.
Mikhual Marseille lamin goal an khung hmasa a, minute 22-ah Arda Guler-a ball chu United forward hlui Mason Greenwood chuan chhuhsakin, box a thlenpui dawnah Timothy Weah tan a pe a, ani hian box dinglam sir atangin kawh zetin a pet a, si khat faiin Marseille chuan hma an hruai.
Marseille hian hma an hruai rei lo, Mbappe chuan bicycle kick hmangin goal a khung teuh viau hnuah penalty spot atangin goal a khung. Box chhungah Geoffrey Kondogbia chuan Rodrygo a titlu a, referee chuan penalty a ham. He penalty hi Mbappe chuan goal-ah a chantir.
Pierre-Emerick Aubameyang pawhin chance tha tak vawi 2 a nei a, vawi khat chu Real Madrid goalkeeper Courtois chuan tha lutukin a lo dang. Tchouameni pawhin box pawn atangin kawh lutukin a shot a, hei hi Marseille goalkeeper Rulli chuan tha lutukin a lo nam over bawk.
Minute 72-ah Carvajal hnawhchhuah a ni a, Marseille goalkeeper Rulli a tauh a, ani lah a thal tawp. VAR hmanga ennawn a ni a, referee chuan direct red card a phawrh. Hemi hnu hian Real Madrid chuan penalty an hlawhchhuak leh.
Vinicius Jr.-a ball chan lai chu Facundo Medina chuan tha lutukin a tackle, mahse a tluk pahin ball a beng palh. Referee chuan penalty a ham a, he penalty hi Mbappe chuan goal-ah a chantir leh a, 2-1 in Real Madrid chuan hnehna an chang ta a ni.
Season hmasa khan quarter finals-ah Arsenal an hneh lo a, La Liga hmahruaitu hian tun season chu Champions League no mawi chawi leh an tum hle. Xabi Alonso chuan a vawi khat nan Real Madrid chu Champions League-ah a chakpui a, September ni 30-ah Kazakhstan lamah an zin ang a, Kairat an hmachhawn ang. Marseille pawhin Ajax an mikhual dawn bawk a ni.
Real Madrid tan Mbappe a vul chho zel, tun season competition hrang hrangah Real Madrid tan game 5 a khel tawh a, goal 6 a khung ta. Tin, Real Madrid a zawm hnuin Los Blancos tan game 64 a khel tawh a, goal 50 a khung tling ta bawk.
Alexander-Arnold chuan a club hlui Liverpool a hmachhawn thei lo maithei, Real Madrid hian November ni 4-ah Liverpool an hmachhawn dawn, kaihza hliam avangin Arnold hi minute 5-na lekah lak chhuah a ni a, engtia rei nge a chawlh dawn tih a la sawi theih loh.
A club thar tan Alexander-Arnold hian La Liga game 4 atangin vawi 2 inkhelh bul a tan a, Champions League-ah inkhelh bul tan leh mah se, hliam avangin minute 5-na lekah lakchhuah a ni. Krismas hma chuan a lo kir leh hman beisei a ni e.