Pawngsualtu nia puh mek Kylian Mbappe chanchin chu media ten nasa takin an thehdarh mek zel a, hetih lai hian a lawyer chuan, "Mbappe hian tihsual leh demna tur engmah a nei lo," tiin a lo sawi ve mek bawk.

Pawngsualtu nia puh chungchang hi Swedish media Aftonbladet chuan a tarlang hmasa ber a, Stockholm police te chuan Mbappe chungchang hi an chhui zui nghal a, kar hmasa lama a thiante nena an thlenna hotel pawh police te chuan ngun takin an dap kual bawk.

In pawngsualna hi central Stockholm-a hotel pakhatah a thleng tih puhtute chuan thawhlehni khan an puang a,  he hotel hi police te chuan dap chhunzawm nghalin, evidence awm thei te an zawng nghal a ni.

International break neih mek a ni a, hetah hian Mbappe chuan France team a zawm ve lo. A thiante leh a chhungte nen hun thawl an hmang a, kar hmasa khan Sweden lamah hun an hmang.

The Aftonbladet-in a tarlan dan chuan, pawngsual thubuai ziak luhtute hian he thil hi inrinnia thleng niin an tarlang a, police te chuan thawhtanni khan hotel an luhchilh bawk.

Real Madrid striker hian he puhna hi a pha nasa hle a, dawt thu lengvak mai mai a nih thu a sawi.

Mbappe lawyer Marie-Alix Canu-Bernard chuan, pawngsuala inpuhnaah hian Mbappe hming hi a tel nge tel lo tih pawh an hriat loh thu a sawi.

"Amah chauhin a awm ngai lo, hetiang thil tha loah hian a inhnamhnawih duh lo bawk. Chuvang chuan he thil hi inpuh mualpho tumna mai niin a lang.

"A tirah phei chuan Mbappe hian a ngai thutak lem lo a, mahse media lamin nasa taka an tarlan tak hnuah erawh mak a ti hle a, a hrethiam lo hle bawk," tiin Marie-Alix Canu-Bernard chuan a sawi.

He puhna thubuai hi engtia kalpui chhoh zel tur nge a ni tih tarlan a ni lo a, hearing te neih a ngaih dawn hmel a, a tum loh deuhin Mbappe hian buaina a tawk chho dawn a ang hle.