Pathiani zan zanlaiah khan PSG chuan Marseille an mikhual a, 4-0 in mual neitu lamin hnehna an chang.

PSG tan Ramos chuan goal hnih khungin, Hakimi leh Muani te chuan goal khat ve ve an khung bawk.

Khelh 6 atangin French Champions hian point 11 an nei a, table-ah pathumna niin, hmahruaitu Brest chu point 2-in an phak lo mek.

French forward Mbappe chu Leonardo Balerdi chuan tackle-in, hliam a tuar a, enkawl nghal a ni a, mual chhungah Mbappe hi a lut leh. Mahse rei a inkhel thei lo, minute 32-ah a bai chhuak a, Gonçalo Ramos chuan a thlak ta a ni.

Mbappe aia lut Gonçalo Ramos hian PSG tan goal hnih a khung chhunzawm a ni. Mbappe hliam hi a na nge na lo tih chu football fan te ngaihven mek a ni a.

PSG coach Enrique chuan an striker hliam dinhmun a sawi chhuak a, a ngaihtuahawm em em loh thu leh lakchhuah kha thutlukna dik tak a nih thu a sawi.

"Ngaihtuahawm a ni lo e, mahse na erawh a ti hle. Lak chhuah kha a fuh a, a dinhmun chu a tha lutuk e," tiin Enrique chuan inkhelh zawhah a sawi.

Nice laka an tlawm hnuah Ligue-a an match hmasa berah PSG chuan 4-0 in Marseille an sawp a, inrinni lo awm turah hian Clermont Foot an hmachhawn leh ang a, kar leh lamah Newcastle United an tlawh dawn a ni.

Champions League Group Stage match-ah hian Mbappe hi a inkhel thei dawn nge dawn lo a sawi theih rih loh a, a hliam te endik a ni ang a, chumi hnuah a chanchin kimchang kan hre thei ang.