Junior Category bika Mizoram Badminton Tournament lian ber, ngaihhlut hlawh ber leh pawisa tamna ber, MBA Official Championship Junior 2022 chu Bazar Veng Community Hall, Lungleiah ni 16 – 19, 2022 chhung khan hlawhtling taka buatsaih a niin zawh fel a ni.
He tournament hi Lunglei District Badminton Association (LDBA) in an thleng a, Under -11 atanga Under -19 inkar category hrang hrangah inelna hi neih a niin players 216 lai he tournament ah hian an tel thei a ni. Triple Champion Thazuala He tournament lian ah hian Mizo naupang zinga badminton player tha leh hmabak nei eng berte zing ami H. Lalthazuala, s/o H. Zohmangaiha, Chanmari West, tuna Ralte Villa Badminton Club tana khel mek chu Under -17 Boy’s Singles (BS), Under -19 Boy’s Singles leh Under -17 Boy’s Doubles (BD)-ah te a champion.
Thazuala hi kum 15 leh thla khat chauh a upa a la ni a, a pa Zohma-a hnen atangin badminton coaching bul a tan a, Mizo badminton coach tha Chhuantea leh Zosiama te hnuai ah in tuaihriam lehin, chumi hnu ah Tata Trust, MBA leh MSSC te hmalakna a din Ramhlun a Regional Development Centre (RDC) ah coaching a kal leh a ni.
Heta a performance hi a that em avangin Pullela Gopichand Badminton Academy, Hyderabad a awm tura thlan Mizo naupang rual zingah telin, tunah he academy ah hian training hautak tak kalin a awm mek. Thazuala hian National Junior Ranking Tournament ah Under-17 BD vawi khat, Under -19 BS leh BD ah vawi thum main draw ah a in vaw tling tawh a. Badminton Association of India (BAI) in ranking a tihchhuah hnuhnun berah Under -17 BD-ah ranking 5-na niin, Under -19 BS-ah 28-na a ni a, U-19 BD-ah 21-na a ni mek bawk a ni.
Tun tournament bik ah hian Under -17 Boy’s Singles (BS) final ah C. Lalramsanga, Durtlang, Ralte Villa BC tana khel chu straight set in a hneh a, Under -19 BS final ah pawh straight set tho a chakin, C. Lalramzauva, Durtlang, Ralte Ville BC player chu a hneh a ni.
Singles in elna bikah Thazuala hian he tournament chhung zawng hian set pakhatmah a hloh lo a, a khel tha fal hle. Under -17 BD lam ah a partner C. Lalramsanga nen champion in, final hmuhnawm takah Lalnuntluanga, NSBC leh Marcus Lalthanzuala, BBC te tangdun chu deciding game-ah 21-16, 22-24, 21-16 in an hneh a ni.
Thazuala hi tun ni 23-28, 2022 chhunga India Junior International Series, Hyderabad-a awm tura players koh zingah telin, U-19 BS leh BD khel turin a inbuatsaih mek a, hemi category tho khel tur hian International Junior Badminton Tournament, Pune a neih turah pawh koh a ni.
Hmeichhe lamah Abigail-i bawk a langsar Kar hmasa lam ah Senior Official Championship 2022-ah Women’s Singles champion a ni zo chauh a, Junior Category lamah pawh ITM University Badminton Academy a badminton zirlai Abigail Lalthazuali, Saron Badminton Club chu Under -19 Girl’s Singles (GS) leh Under -19 Mixed doubles (XD) ah a champion kawp leh. U-19 GS ah hian kar kalta a Senior Official Women’s Singles final a khelhpui Lalrempuii, Serchhip, Ralte Villa BC nen bawk final an khel leh a, Abigail-i hian chakna changnawn in, game hmuhnawm takah Rempuii hi 21-12, 18-21, 21-19 in a hneh hram a ni.
Abigail-i hi U-19 XD lamah Mano Malsawmdawngliana, Bawngkawn BC nen inkawp in, final-ah Lalramzauva leh H. Lalchhanhimi, Ralte Villa BC te tangdun chu straight set in an hneh bawk a ni. Abigail-i hian ITM University lama badminton zir tura a kal hma hian Serchhip Regional Development Centre ah, Coach Albert Lalnunhlima hnuai ah badminton khelh a zir thin a ni.
Result kimchang
U-19 Boy’s Singles Champion : H. Lalthazuala, Ralte Villa BC
Runners up : C. Lalramzauva, Ralte Villa BC
U-19 Girl’s Singles Champion : Abigail Lalthazuali, SBC
Runners up : Lalrempuii, Ralte Villa BC
U-19 Boy’s Doubles Champion : Mano Malsawmdawngliana & Marcus Lalthanzuala, BBC
Runners up : C. Lalramzauva & PC Lallawmkima, Ralte Villa BC
U-19 Mixed Doubles Champion : Mano Malsawmdawngliana, BBC & Abigail Lalthazuali, SBC
Runners up : C. Lalramzauva & H. Lalchhanhimi, Ralte Villa BC
U-17 Boy’s Singles Champion : H. Lalthazuala, Ralte Villa BC
Runners up : C. Lalramsanga, Ralte Villa BC
U-17 Girl’s Singles Champion : Lalrempuii, Ralte Villa BC
Runners up : Zoramthari, Ralte Villa BC
U-17 Boy’s Doubles Champion : C. Lalramsanga & H. Lalthazuala, Ralte Villa BC
Runners up : Lalnuntluanga, NSBC & Marcus Lalthanzuala, BBC
U-15 Boy’s Singles Champion : Sainunmawia Sailo, BBC
Runners up : Malsawmhlua, Ralte Villa BC
U-15 Girl’s Singles Champion : H. Lalrinhlui, Ralte Villa BC
Runners up : Zoramthari, Ralte Villa BC
U-15 Boy’s Doubles Champion : Malsawmhlua, Ralte Villa BC & Vanlalpekhlua Sailo, SKBC
Runners up : Sainunmawia Sailo & Samuel F. Rodinga, BBC
U-15 Girl’s Doubles Champion : MC Romalsawmi & Malsawmhlui, MUBC
Runners up : H. Lalrinhluii & oramthari, Ralte Villa BC
U-13 Boy’s Singles Champion : Mesak Lalrawngbawla, Ralte Villa BC
Runners up : HT Rohminghlua, Dinthar BC
U-13 Boy’s Doubles Champion : H.T Rohminghlua, Dinthar BC & Mesak Lalrawngbawla, Ralte Villa BC
Runners up : Benjamin Malsawmkima & Jonathan Lalremtluanga, BBC
U-11 Boy’s Singles Champion : Abraham Lalnunthara, Serchhip BC
Runners up : Lalhlimpuia, NSBC