Mikel Arteta chuan inrinnia Leeds United an sawp ṭum khan, kum 15 mi lek winger Max Dowman chu Premier League-ah a vawi khatnan a inlantir.
Leeds United a hmachhawn khan Dowman hi kum 15 leh ni 234 a ni a, Arsenal tana Premier League-a inlan thei naupang ber dawttu a ni.
Hun tawp lamah Dowman chuan penalty a hlawhchhuak a, he penalty hi Gyokeres chuan goal-ah a chantir a, 5-0 laiin Arsenal an chak.
Inkhelh zawhah kum 15 mi Max Dowman chu media te chaw tui ber a ni chho, thiamna leh theihna sang tak a nei a, football pundit leh Arsenal player hlui Theo Walcott phei chuan Lionel Messi nen inang a tih thu a sawi bakah, football en a phur phah thu a sawi chhuak bawk.
"Dowman hian theihna sang tak a neih avangin Mikel Arteta pawhin a rawn khelhtir a, min tiphur hle mai," tiin Arsenal-a kum 12 ngawt hun hmang Walcott chuan a sawi.
"Ball a keng thei a, ball a khalhin a che rang em em bawk. A balance a hmang thiam bawk, Messi a ang ka ti khawp mai. Messi ka lo hmachhawn tawh ṭhin a, ball a chan loh hi chuan a che rang em em lo, ani aia ka chet ran zawk vang pawh a ni thei.
"Messi chuan ball a'n chang a, a ke a rang a, awlsam takin min bum tlang miah miah zel. Chutiang theihna chu Dowman hian a nei a ni," tiin Walcott chuan a sawi.
Dowman-a rilru put hmang chuan Walcott a tihlim hle nghe nghe, pianpui thiamna ril tak nei niin a ngai bawk.
"Zirtir theih miah loh, pianpui thiamna a nei sa niin ka hria. Zalen tak leh hahdam takin a inkhel thei.
"Football hi kan ngaina em em, chutih laiin a chang hi chuan a hmuhnawm loh ṭhin. Mahse Dowman-a inkhel en erawh a phurawm ka ti khawp mai.
"Ball a chan hi chuan danglamna thlen thei a ni tih a chiang a, chu chu ka ngainatna chhan pakhat a ni a, ani ang thiamna nei an rawn inlar chho hian football en pawh a tinuam thar leh e," tiin Walcott chuan a sawi bawk.
Kum 16 mi a nih laiin Walcott pawh hi Arsenal tan a inlan a, a hnuah England tana koh a ni chhunzawm bawk. Pressure tam tak a tawng a, chutiang chu Dowman pawh hian a tawng chho ve dawn niin Walcott chuan a ngai.
"Dowman-a hmachhawn tur hautak em em pakhat chu pawn lam thawm bengchheng a ni. School kal lai a ni bawk nen, miin an hre lar tawh a, kawnga a kal te pawhin an hre zel tawh dawn, chung te chu thiam taka a hmachhawn a ngai dawn.
"Social media a awm tawh bawk nen, kan naupan lai kha chuan social media ang hi a la awm lo a, a la zia deuh. Tunah chuan social media a awm tawh bawk a, khawlvel a danglam tawh hle, chungte chu a hmachhawn tur zinga mi a ni," tiin Walcott chuan BBC Radio 5-ah a sawi a ni.