Australian Rugby League player Corey Norman chu a khingpui mawng a kawm avangin match 8 hrem a nih bakah £500 chawitir a ni. He hremna hi Nilaini khan Rugby Football League chuan a puang a, Rugby Football League-a inhremna na ber a ni nghe nghe.

Kar hmasa Ningani khan Toulouse leh Warrington Wolves an inhmachhawn a, an inbawhbeh laiin kum 31 mi Norman hian an khingpui player Oliver Holmes-a mawng a kawm a, hrem a ni ta a ni.

Norman hi Australia National Rugby League-ah kum 11 chhung zet a lo khel tawh a, Rugby chawlhsan a tum mek laiin kumin April thla khan Toulouse a zawm leh ta a ni.

A thubuai hi Justice Sarah Wright chuan a ngaihtuah a, Norman hian tih luih a nih loh thu leh thiam lohna engmah a neih loh thu sawi mah se, Judge chuan tum reng vanga ti nia a ngaih ngaih avangin Nilaini khan hremna a ti chhuak ta a ni.

Toulouse hi Super League-ah a mawngphah an ni mek, game 4 khelh tur an la nei a, relegate lo tura an beih mek laiin heti hian an player tha an hrem chu a ni a, an dinhmun a tha lo hle a ni.