Pathianni zan khan Old Trafford-ah United leh Chelsea te chu 1-1 in an inhnehtawk. Hun tawp dawna thil thleng khan sawi zui a hlawh a, Lisandro Martiez chu hnawhchhuah phu niin Enzo Maresca chuan a sawi.

Hun tawp dawn, hun pek belhah United defender Martinez chuan Cole Palmer a tlawh thlu, VAR hmanga ennawn a ni a, referee Rob Jones chuan yellow card chiah a phawrh.

Cole Palmer kha a inkhel chhunzawm leh a, mahse a khupah hliam a tuar tih a chet dan atangin a lang thei.

"Dressing room-ah pawh Palmer khan vurin a khup kha a dep reng, a nat lutuk loh kan beisei, referee thutluknaah erawh ka lawm lo.

"Red card phawrhna tur chiang tak niin ka ngai a, mahse referee khan ka rin loh dan lam daihin thutlukna a siam.

"Ball khawih fuh kha a tum lo a, a khupah a tlawh kha a ni a, red card tur a ni e," tiin Chelsea boss Maresca chuan a sawi.

Match official te chuan uluk takin VAR hmangin an ennawn a, red card phawrhna tur chi niin an ngai lo niin a lang a, match referee thutlukna an kalpui tlang ta a ni.

Kha thil thleng chungchang khan United interim manager Ruud van Nistelrooy zawh a ni a, "Ka hmu chiang lo, touchline atangin ka thlir ve mai a, red card phawrhna tur chi niin ka ngai lo," tiin a chhang.