Ningani zan zanlai khan Euro 2024 qualifier match-ah Portugal chuan 4-0 laiin Liechtenstein an hneh. 

Portugal tan Cristiano Ronaldo chuan goal hnih a khung baka, Cancelo leh Bernardo Silva ten goal khat ve ve an khung.

Ronaldo hian minute 51-ah penalty atangin goal a khung a, minute 63-ah free kick atangin kawh zetin a chhuih goal bawk.

 Portugal captain hian ram tana khel tam ber record thar a siam a, Portugal tan game 197 a khel a, goal 120 a khung tling ta bawk.

Qatar World Cup atanga an tlak khan Ronaldo hian ram tana inkhelh chawlhsan a lo tum tep hman a, Morocco an hneh loh tum khan Fernando Santos chuan bench-ah dahin, a hnuah a luhtir chauh a nih kha.

Roberto Martinez chu Portugal coach thar a ni a, a enkawlna hnuaia an game hmasa berah hian Cristiano Ronaldo chu ko lehin, team captain atan a hmang chhunzawm a, a tisual lo chiang hle.

Martinez chuan, "A inpekna hi team tan a tangkai a, a tawnhriat te hi kan chhawr tangkai thei dawn, a theihna leh thiamna team tan Cristiano hian a lantir leh a ni," tiin Ronaldo a fak.

An game chungchang sawi chhunzawmin, "Portugal tana khelh hi player-te hian nuam an ti hle mai, player te hian ka game duan ang an zui thei a, kan khelh hmabak atana inbuatsaihna tha tak a ni e.

"Ka tan pawh player-te hriatchianna hun tha tak a ni a, an thiamna leh theihna ka hriat bakah, anni ho nen inkungkaihna tha tak a ni chho bawk.  Kan result-ah hian ka inchhuang hle a ni," tiin Martinez chuan a sawi bawk.

Cristiano chuan, "National team tana ka khel leh thei leh, goal ka khung leh thei hi nuam ka ti tak zet. Ram tana khel hnem ber record ka nei thei hi ka inchhuang bawk," tiin social media lamah a tarlang.

Euro 2024 qualifier match-ah Portugal hian Pathianni lo awm turah hian Luxembourg an hmachhawn leh dawn a ni.

Ronaldo hi kum 38 mi a ni tawh a, Euro 2024 hi chu khelh leh ngei a la tum hmel a. Saudi league lamah a khel mek, hetih lai hian coach-in a chhawr thiam chuan, level sangah pawh a la khel thei tih a lantir kan ti thei awm e.