Transfer deadline day-ah Chelsea chuan Manchester United atangin loan-in Jadon Sancho an la lut a, tun season chhung atan England midfielder hian Chelsea-ah a khel ang a, nipui bazar inhawn leh hunah Blues hian Sancho hi an lei thei dawn bawk a ni.

Sancho hi United chuan £73m laiin Borussia Dortmund atangin an la lut a, mahse Erik ten Hag nen an inkarah harsatna a awm avangin BVB lamah United-in loan-in an kaltir leh a. Tun nipuiah kir lehin, Chelsea lamah an kaltir leh ta a ni. Chelsea chuan Sancho hi nakkum nipuiah  £20-25m emaw velin an lei thei dawn bawk a ni.

Chelsea hian attacking player Christopher Nkunku, Nicolas Jackson, Pedro Neto, Mykhailo Mudryk, Noni Madueke, Cole Palmer, Joao Felix leh Marc Guiu te an nei bawk a, hetih lai hian Sancho an duh leh kherna chhan chu Maresca vang a ni.

Enzo Maresca hi Manchester City staff a lo ni tawh thin a, Jadon Sancho pawh a lo hrechiang em em bawk a, a lo enkawl tawh Sancho hi Maresca hian Chelsea-ah tha taka a chhawr theih a inring a, heti hian an la lut ta a ni.

Chelsea-ah Sancho ropui taka a khel thei a nih phei chuan, nipui bazar inhawn leh hunah £20-25m vel lekin an lei thei dawn bawk a, Blues tan chuan transfer tha tak a nih ngei a rinawm.