The Professional Football Association (PFA) chuan Raheem Sterling leh Axel Disasi an enkawl dan chungchangah Chelsea chu thu an zawtfiah a, Chelsea boss Enzo Maresca chuan thil awmzia a sawifiah.

Sterling leh Disasi te hi Chelsea squad zingah an training lo chhunzawm zel a, tun nipui bazar inhawn lai khan Chelsea bomb squad-ah tel mah se, an hralh thei ta lo a nih kha.

Pre-match Press conference-ah Enzo Maresca chu Sterling leh Disasi chungchang zawh a ni a, Maresca chuan, "Ka pa hi kum 75 mi a ni a, kum 50 chhung teh meuh mai sangha mantu a ni. Zing dar 2 aṭangin chawhma dar 10 thleng rim takin hna a thawk ṭhin a, hei hi hna rim tak chu a ni, player te erawh an la hahdam lutuk.

"Reheem leh Axel te dinhmunah hian ka inchan a, an rilru puthmang tur chu ka hriatthiampui. Senior team zinga training an duh ve ang a, inkhelh te pawh an duh ve ngei ang. Chutih laiin chhan hrang hrang avangin hetiang hian kan inenkawl a, club chuan hma an sawn theih nan an mamawh zawng zawng kan pe a ni.

"Chelsea mai kan ni bik hleinem, khawvel club hrang hrangah heng hi chu a thleng. Italy, Spain, England, France, USA leh Brazil-ah pawh, player leh club inkarah harsatna a awm ṭhin alawm. Club chuan player te mamawh zawng zawng kan pe, squad-a an tel loh chuan a chhan a awm a ni mai a ni," tiin a sawi.

Sterling hi Chelsea player zinga hlawh hnem ber a ni a, kar khat chhungin £300,000 vel a hlawh. Enzo Maresca-a'n thla 15 Chelsea a enkawl chhungin Blues tan a inlan leh tawh lo. Season liamta khan Arsenal-ah loan-in a kal a, tunah Chelsea-ah a kir leh. Disasi pawh season hmasa chawhnu lam khan Aston Villa chu loan-in a zawm a, ani pawh Maresca-a hnuaiah hmun a chang lo mek a ni.