Pathinnni zing khan Axiata Arena, Kuala Lumpur, Malaysia-ah Manny Pacquiao-a chuan khawvel boxer tha a nih zia a lantir nawn leh a, kum 10 dawn knockout-in chak tawhlo mahse; boxer tha Lucas Matthysee-a chu knockout-in a hneh.

Pacquiao(60-7-2, 39 kos) hi December-ah kum 40 a tling ve dawn ta a, mi tam takin a vanglai pel tiin sawisel mahse; Argentine boxer Lucas Matthysee lakah fighter tha anih zia a lantir nawn leh.

Pacquiao-a hian a chet ranna a hmang tangkai hle a, mipui thawm pawh a ring tha hle. Khawvelin Pacquiao-a knockout an hmu khat ta hle a, kum 2009 kum khan Miguel Cotto-a chu technical knockout-in a hneh a, hemi hnua knockout hmanga a chak leh hmasak ber a ni.

Fight zawhah Pacquiao-a chuan ka chak theih chhan leh tun dinhmun ka thlen theih chhan hi Pathian vang anih thu sawiin; Phillipine mipuite thlawpna ah a lawm thu a sawi bawk.

Weight category 8 ngawta champion thei awm chhun Pacquiao-a vanglai a la chuai lova, nikum July thla khan Jeff Horn-a lakah sawisel hlawh takin a chak lova, tunah erawh khawvel mipui hmaah fighter tha anih zia a lantir nawn leh.

He fight-ah hian Matthysee-a hi Pacquiao-a lakah a che theilo a ni ber. Mi tam takin kutthlak na tiha an sawi ni mahse; boxing legend Pacquiao-a lakah chuan a thiamna a hmang theilo. Pacman-a hian round 3 ah hnek thlu a, hemi hnu hian round 7-ah hnek thlu lehin referee-in fight a titawp zui ta bawk.

Matthysee-a chuan boxer tha Manny Pacquiao a tum thei chu a lawm thu sawiin, " Fighter tha Manny Pacquiao ka tum thei hi ka damchhung nuna thil hriat reng tlak a ni a, boxing legend a nih bakah fighter tha leh champion ropui tak a ni," tiin Pacquiao chu a fak zui bawk.

Tun kum tawp hian Pacquiao promoter Bob Arum chuan pound for pound tha bera chhal mek lightweight champion Vasily Lomachenko leh Pacquiao intum turin a duh hle a, boxing legend Pacquiao erawh chuan,"Tunah chuan ka chhungte nen hun hlimawm tak hman rih ka duh a, ka fight leh zel tur chungchang ka la sawi thei rihlo", a ti thung.