Manipur sawrkar chuan FIFA Under-17 World Cup-a tel an state player pariat an chawimawi a, cheng nuaih nga (5 lakh) țheuh an hlan.

Chawimawina hun hi state secretariat-ah neih niin Manipur Chief Minister N Biren Singh chuan player pariatte hi an chhuang hle tih a sawi a, chawimawina hunah hian Manipur Governor Najma Heptulla pawh a tel.

Biren chuan, "Tunge chaka tunge tlawm tih hi a pawimawh lo, pawimawh zawk chu kan khelhdan leh kan inpekna zawk hi a ni. World Cup ngaihhlut taka tel pha player pariatte hi Manipur mipui zawng zawng hian kan chhuak tak meuh meuh." tiin a sawi.

FIFA Under-17 World Cup khelh mekah a thlengtu India-in beisei an nei tawh lo va, group match vawithum an khelhah point an hlawhchhuak lo va an tla fel tawh.

India team hian an game hmasa berah si thum faiin USA an hneh lo va, an game hnihnaah 2-1 in Colombia an hneh lo leh an game hnuhnung berah Ghana an hneh lo bawk.

India team-ah hian Manipur-in player thawh hnem berin player pariat an thawh a, India captain Amarjit Singh Kiyam kha Manipuri a ni nghe nghe a, Amarjit bakah hian Moirangthem Dheeraj Singh (goalkeeper), Boris Thangjam (defender), Jeakson Thounoujam (midfielder), Md Shah Jahan (midfielder), Nongdamba Naorem (midfielder), Suresh Wangjam leh Ningthoinganba Meitei (midfielder)-te pawh kha Manipur mi vek an ni.

India team-ah hian Lalengmawia (Apuia) pawh koh tel niin Mizo zinga World Cup khel hmasa ber a ni a, World Cup khelh hma khan damlohna in tlakbuak mahse India coach-in a hnar phal lova khelmualah erawh kan hmu tam thei ta lo a ni.