Manchester United-in De Jong lak an tum

13th May 2022, 05:05PM

Manchester United manager thar tur Erik ten Hag chuan kumin nipui bazarah Barcelona midfielder Frenkie de Jong chu Old Trafford-a lakluh a tum niin chanchinbu mite chuan an tarlang.

Ten Hag hian Ajax lamah kum 2017 leh kum 2019 inkar chhung khan De Jong hi a lo enkawl tawh a, a player pawimawh tak ni thin a ni a, United-a a midfielder pawimawh ni tura lakluh leh a duh.

Ajax hian kum 2019 khan beisei loh takin Ten Hag-a enkawlna hnuaiah hian Champions League semi-final an thleng a, hetah hian De Jong hi an player pawimawh tak niin, a hnu lawkah Barcelona hian pound maktaduai 75 sengin Dutch midfielder hi an lalut.

Midfielder pathum Paul Pogba, Nemanja Matic leh Juan Mata te chuan tun season zawh rualin United an chhuahsan vek dawn a, United hian kumin nipui bazar inhawn hunah hian midfielder pakhat tal an lakluh a rinawm.

Kum 25 mi De Jong hian tun season bakah Camp Nou-ah hian kum hnih daih contract a la nei a, Barcelona hi sum lama an la harsat avangin Barcelona hian De Jong hi hralh an tum nia sawi a tam hle a, United hian hei hi remchanga lak an tum niin a lang.

United hian Lazio midfielder Sergej Milinkovic-Savic chu lakluh tum mah se, Lazio hian an midfielder hi an hralh phal loh avangin United hian man tlawm zawka an lak theih tur De Jong-a lam hi an hawi mai a rinawm hle a ni.

Copyright © inkhel.com 2022. All rights reserved.