Nemanja Matic chuan tun season tawpah Manchester United a chhuahsan dawn tih a puang.

Kum 33 mi hian kum 2017 khan Chelsea aṭangin Manchester United a zawm a, Red Devils tan hian game 183 khelin goal li a khung tawh.

Kum nga a awm chhung hian nomawi a chawipui lova, FA Cup leh Europa League-ah final luhpui mahse nomawi chawi lovin an awm.

Instagram-ah a chhuah tur hi sawiin Matic chuan, "Ngaihtuahna nasa taka ka sen hnuah tun season hi Manchester United-a ka season hnuhnung ber ni turin thutlukna ka siam. Ka chhuah tur thu hi board, manager leh player-te pawh ka hrilh tawh.

"Club ropuia ka khel thei hi chawimawina leh ropuina a ni a, min thlawp tlattu fan-te hnenah pawh ka lawm tak meuh meuh." tiin a tarlang.

Serbian midfielder hian tun season Premier League-ah game 17 a khel tawh a, United-ah hian kum 2023 June thla thleng daih contract la nei mahse chhuah a thlang ta zawk a ni.