Omar Marmoush chuan Pathianni zana Manchester Derby a khel thei dawn lo tih Manchester City chuan an tarlang.

Marmoush hi ram tana a feh chhuahnaah a inhliam a, a hliam hi a khup niin, eng tia reng nge a chawlh dawn tih sawi lawk theih a la ni lo a, Manchester Derby chu a khel ve thei dawn lo tih a chiang phawt.

Thawhlehni khan World Cup quarlifier match-ah Egypt chuan Burkina Faso an hmachhawn a, kha match-ah khan kum 26 mi Marmoush hian a khup a tihliam.

Egypt-ah a hliam hi endik hmasak phawt a ni ang a, chumi zawhah Manchester-ah a kir leh nghal ang a, a hliam dan tak leh a chawlh hun chhung tur te nen a hriat theih dawn a ni.

Egypt National team doctor Mohamed Abou El-Ela chuan Man City forward hi a khup a hliam tih a sawi chiang a, si hnih faia Ethiopia an hneh khan darkar khat a khel a, an match hnihnaah a inhliam ta a ni.

Egypt international hi tun season Premier League game thum khelh tawhah a la inlan vek a, Tottenhan leh Brighton laka an tlawm tum khan inkhelh bul a tan nghe nghe.

Pep Guardiola chuan player inhliam a nei nual, Rayan Cherki chu malpui hliam avangin thla hnih emaw vel a chawlh a ngai dawn. Phil Foden, Mateo Kovacic leh Kosko Gvardiol te chu international break neih hma khan an inhliam tawh a, John Stones pawh tihrawl hliam avangin England squad-ah a tel ve thei lo bawk.