Senior level-ah Manager hna an thawk tan ve, kum khatnaa trophy an chawi nghal a nih phei chuan a hluin a ropui dangdai bik thin khawp ang le.
Manager lar tak tak José Mourinho, Arrigo Sacchi, Sir Alex Ferguson leh Carlo Ancelotti te pawhin-a an tih theih miah loh chu tun kar liamta khan Mikel Arteta chuan a rawn ti tlat mai.
Manchester City-ah Guardiola-a assistant ni thin kha a ni a, Arsenal chuan manager atan an la, a season khatna lekah FA Cup a chawipui tlat mai. Manager thar; an kum khatnaa trophy chawi nghal thenkhat tarlang ila.
1. Kenny Dalglish (1985/86) - First Division, FA Cup
Football a khelh lai pawhin player ropui a ni. Joe Fagan a bang thut si a, Liverpool chuan anmahni kaihruai tur manager tha an zawng, chutih laiin Kenny Dalglish an ruai ta thut mai. Ani hi player leh manager ni kawpin a awm a, Liverpool player-te rilru a chawk tho, a kum khatnaah trophy pahnih a chawi, point hnih chiahin an hmelma Everton an khum a, League champion an nih bakah FA Cup final-ah Everton an hneh a, hemi kum hian trophy pahnih an chawi a ni.
2. Johan Cruyff (1985/86) - KNVB Cup
Football a khelh laiin a ropui hle, coaching a luhchilh hnuah pawh hna ropui tak a thawk a, La Masia-a a hnuhma pawh kan hre vek ang, sawi nawn a ngai tawh kher lovang. Seniro level-ah manager a nih hmasak ber kumin Johan Cruyff hian Amsterdam club a enkawl a, KNVB Cups a chawi nghal a ni.
3. Sam Allardyce (1991/92) - League of Ireland First Division
Premier League-ah pawh coach tha tak a nih zia kan hre awm e. Big Sam hian bul tan tha viau mahse a hnu lamah erawh trophy a chawi lem lo. Club 11 lai a enkawl atangin trophy pahnih chiah a chawi. Manager a nih hmasak ber kum 1991/92-ah League of Ireland First Division title a la a ni.
4. Chris Wilder (2001/02) - NCEFL Premier Division, NCEFL League Cup, NCEFL President's Cup, Derbyshire Senior Cup
Chris Wilder hi football a khelh laiin defender a ni thin. Football a khelh chhungin club hrang hrangah a kal kual nasa hle. Manager a nih hnuin Sheffield United nen club 5 a enkawl tawh a, tun season liamta khan Sheff United chu Premier League-ah 9-na a nihpui. Manager a nih hmasak ber tumin Alfreton Town a enkawl a, NCEFL Premier Division, NCEFL League Cup, NCEFL President's Cup, Derbyshire Senior Cup te a hlawhchhuahpui nghal a ni.
5. Pep Guardiola (2008/09) - La Liga, Copa del Rey, Champions League
Manchester City manager Pep Guardiola hi coach tha a nih zia chu kan hre chiang. Tunlai manager zingah chuan man to ber zing ami a ni mek. Barcelona team kha a enkawl hmasak ber niin a treble pui nghal hem mai, La Liga, Copa del Rey, Champions League te a chawipui a nih kha. A thiamna piah lamah khang hunlaia Barcelona team kha an tha em bawk a ni kan ti thei awm e.
6. Ole Gunnar Solskjaer (2010/11) - Norwegian Eliteserien
Manchester United forward hlui Solskjaer hian senior level-a managerial career a zawh hmasak berna chu an ram club Molde niin a season khatnaah Norwegian Eliteserien title a lakpui nghal. United-in Mourinho an ban a, caretaker atan Solskjaer hi an la, caretaker a nih laiin ropui takin United a khelhpui, an la nghet chhunzawm a, tun season liamta khan Premier League table-ah pathumna a nihpui bawk a ni.
7. Zinedine Zidane (2015/16) - Champions League
A inkhelh laiin player ropui a ni, coaching lam a luhchilh hnuin Real Madrid B-Team a enkawl. Real Madrid chuan Rafa Benitez an ban a, Zidane hi senior team manager atan an lalut, an tisual lo chiang khawp mai. A season khatnaah Champions League title a lakpui a, an inruai chhunzawm zel, a zawnin vawi thum ngawt UCL a chawipui. Real Madrid a chhuahsan ren rawn a, an ruai nawn leh, tun season liamta khan La Liga title a lakpui leh bawk a ni.
8. Casey Stoney (2018/19) - Women's Championship
England hmeichhe team captain hlui Casey Stoney hian hmeichhe club thar Manchester United chu enkawl nghalin a season khatnaah game 20 atangin vawi 18 lai hnehna chanpuiin Championship title a lakpui a. Top-flight-ah pawh a season khatnaah United chu palina a nihpui bawk.
9. Mikel Arteta (2019/20) - FA Cup
Inrinni zan khan FA Cup final-ah 2-1 in Chelsea an hneh a, Arsenal chuan FA Cup vawi 14-na atan an chawi a, Arteta hian football a khelh laiin Arsenal tan FA Cup a chawi a, manager a nih hnuah a season khatnaah Arsenal tan FA Cup a chawi leh bawk.
Arsenal chu league-ah 8-na nihpui mahse FA Cup an chawi avangin Europa League a khelhpui thei dawn. Manchester City assistant manager hlui Arteta hian coaching lamah hmabak eng tak a nei niin a lang.
Source : Robbie Copeland @ 90mins