Erik ten Hag chuan Marcus Rashford chu a hma hunah pawh Manchester United la thlang zel turin a duh a, Dutchman hian United hi khawvela team tha berah siam a duh avangin chutah chuan Rashford hi a pawimawh tur thu a sawi.

United tana a game khelh hnuhnung pariatah Rashford hian goal riat ngawt a thun tawh a, tunah hian United top scorer a ni mek.

He England international hian minute 124 chhunga goal thun ziah ang vel a ni a, tun season-ah inelna hrang hrangah vawi 28 inlan tawhin goal 17 a thun tawh.

United-ah hian Rashford hian kum 2024 thleng chauh contract a nei tawh a, mahse Ten Hag chuan contract thar ziahpui theih a inbeisei hle.

Zanin nilaini zan zanlaiah hian Man Utd hian EFL Cup semi-final ah Nottingham Forest an hmachhawn dawn a, chumi hmaa an kawmnaah Ten Hag chuan, "Helai hmun hi a awmna ve reng hi a ngai, a chhan chu team tha ber din kan duh avangin. A hmasa berin England-ah, a dawt lehah Europe-ah, chuti chuan khawvel pum huapa tha ber nih ka tum ang.

"Club leh players te inbiakna hi chu puan zar chi a ni loa, mahse tuna a khelh mekna team Manchester United hi boruak tha tak hnuaiah kan awm mek tih amah pawh hian a hria, a tha thei ang berin a khel mek a ni.

"Hma a sawn a, zaah zain a inpe.

"Kan tana a pawimawhzia a hria a, hlawhtlin kan duh a nih chuan Rashford hi kan mamawh a ni," tiin a sawi.

Rashford hian hma a sawn em em lai hian nikum lawka sum tak senga Ajax atanga an lei Antony erawh hi chu United ah hian hmun nghet chan tuma a beih a la ngai mah se Ten Hag chuan, "Game chhe tak a khel ngai hran lo.

"A inkhel a, team an chak a, chutah chuan a khelh that leh that loh chu a chiang mai.

"Tun aia tha hi chu ala ti thei a. Hma a sawnna tur tam tak erawh chu ala awm," tiin a sawi a ni.