Manchester United chuan Harry Maguire leh Anthony Martial bakah Alex Telles te hralh chhuah an tum niin report thenkhat chuan an tarlang a. Player tha tawk tak lak luh an duh vang a ni.

Old Trafford-a hruai luh tur player tha tawk tak lak luh an tum avang hian nipui bazar-ah £100m vel tal insen an inhuam. Chung zingah chuan Napoli striker Victor Osimhen, Tottenham striker Harry Kane leh West Ham midfielder Declan Rice te hi hming langsar ber pawl an ni.

Premier League star player leh England international pahnih Kane leh Rice hi United hian an hrechiang viau tawh a, Osimhen pawh Serie A hmahruaitu Napoli tan a che tha thin viau.

He Nigerian striker hian league match a khelh tawh vawi 17 ah goal 16 lai a thun tawh a, tuna Napoli in point 13 ngawta hma an hruai theih nan hian player pawimawh berte zinga mi a ni.

Manchester Evening News chuan a tarlan danin, Telles, Maguire leh Martial te hralh chhuah a, £100m-a player thar tha tawk tak lak luh an tum.

Kane leh Osimhen te hi an lak luh tum ber a ni a, chutiang bawk chuan Benfica striker Goncalo Ramos leh Ajax midfielder Mohammed Kudus pawh an thlithlai mek niin report hian a tarlang tel bawk.

Hetihlai hian, West Ham midfielder Rice pawh United hian season tan hma khan £100m in an bid a, mahse West Ham hian an hnawlsak niin Talksport chuan a lo tarlang ve bawk a. Nimahsela, season tawp lamah United hian £120m plus add-ons in dawr nawn leh an tum niin report hian a tarlang tel bawk.

United hian Osimhen-a manah £107m (€120m) pek an inhuam a, Chelsea nen an inchuh dawn niin The Express chuan a tarlang ve bawk a ni.