Manchester United leh Newcastle United te chuan RB Leipzig striker Benjamin Sesko an inchuh na hle mai. Newcastle United chuan a vawi hnih nan bid an thehlut leh ta bawk.
An vawi khat bid-naah Newcastle United khan €80m an thehchhuak a, kha kha RB Leipzig chuan an lo hnar. Nizan zanlaiah khan Newcastle United chuan an vawi hnih bid-na an thehlut leh a, an sum thehchhuah zat hi official taka puanzar ni lo mah se, €90m an thehchhuak nia report a ni.
Newcastle United hian Sesko hi a man to mah se, lak an tum tawp a ni ber a, sum lamah an buai lem lo. Hetih lai hian player duhthlanna a pawimawh ber dawn a, Sesko hian a duh a la thlang lo nia tarlan ni mah se, Manchester United lamin bid an thehluh ve dawn tak avang hian eng emaw chu hriat ruk a awm niin a lang tlat mai.
Manchester United leh Newcastle United-in Sesko an dawr dan hi a inang lo. Newcastle chuan a man to deuh mah se, club-in a chhiar zat chu pek mai an tum. Hetih lai hian Manchester United erawhin, Sesko-a'n Old Trafford pan a duh chuan, an bid ve chauh dawn a, Magpies thehchhuah ang zat hi chu Red Devils hian an thehchhuak thei dawn lo niin The Athletic chuan a tarlang.
Hetia Manchester United-in Sesko an bid ve ngamna chhan chu Sesko hian Old Trafford lam pan a chak zawk niin a lang ta. Skysports pawhin a tarlang chiah bawk a, Sesko hian St. James' Park pan ai chuan Old Trafford pan a chak zawk. Hei hi Man United pawhin Sesko an bid ngamna chhan a ni ta chiah dawn a ni.
RB Leipzig-in Sesko-a man an chhiar zat chu eng pawh nise, player berin a pan duh zawk kha a pawimawh dawn niin Fabrizio Romano chuan a tarlang a, Leipzig lamin man to takin chhiar mah se, a pan duh club-in an chhiarna zat aia tlawma lei an duh tlat chuan, transfer hi a thleng ngei dawn tho niin Fabrizio Romano chuan a tarlang a ni.
Manchester United hian Sesko hi lo chang ta pawh nise, €70m vel emaw tal chuan an lei a ngaih dawn hmel a, hetiang zat sum an thehchhuak a nih chuan, Premier League PSR Rules-in a phuar dawn. Hei vang hian loh theih loha Rasmus Hojlund an hralh a ngaih phah dawn niin Sky Sports chuan a tarlang a ni.
Kar hmasa khan Manchester United chuan an striker Hojlund hi £30m velin an hralh phal niin BBC chuan a tarlang a, Denmark striker hian Old Trafford-a cham chhunzawm zel duh mah se, Sesko an la a nih chuan a chhuah mai a ngaih dawn hmel a ni.
Newcastle United hian an striker Alexander Isak an chelh theih an inrin loh avangin Sesko hi man to tak pawha lak an hnial lo a, Isak hi Liverpool lamin lak tumin an hel ve reng a, Reds chuan £110m thehchhuakin Isak lak an tum, hei hi Newcastle United chuan an lo hnar phawt a ni.
RB Leipzig-a Sesko-a contract hi kum 2029 thleng daih a ni a, nikum mai khan contract thar a ziak a, sum tam tak nena dawrtu an dawn chuan, Leipzig hian chhuahtir an hnial dawn lo a ni.
Slovenia International hian kum 2023 khan Red Bull Salzburg atangin RB Leipzig hi a zawm a, Leipzig tan game 87 atangin goal 39 a khung tawh a, assist vawi 8 a nei tawh a ni.