Ruben Amorim-a'n Manchester United a pan mek a, a chhawr thiam em em Viktor Gyökeres pawhin Old Trafford a pan ve mai dawn niin English media te chuan an tarlang nasa.

Sporting CP goal khung khawl hian season hmasa atanga chhiarin, Portuguese top-flight ah game 43 atangin goal 45 lai a khung ta a, assist vawi 11 neiin, chance vawi 74 lai a siam bawk. Tin, shooting accuracy hi 51.5% a nei bawk. Kumin chhungin game 51 atangin goal 53 lai a khung tawh bawk a ni.

Manchester United hian striker pahnih Hojlund leh Zirkzee te nei mah se, tun thlasik bazar inhawn lai hian United chuan striker thar an la lut dawn niin Mirror chuan a tarlang.

Hetih lai hian Viktor Gyökeres hian tun season chhung chu Sporting lamah hun a hmang ang a, nakkum nipui bazarah £63m-in a lei chhuah theih dawn a, hetih hun hi Manchester United chuan an nghak dawn niin Skysports chuan a tarlang bawk.

Manchester United hian goal khung lamah harsatna an tawk mek. Tun season Premier League game 10 atangin goal 9 chiah an la khung a, goal 12 lai chhuah tawhin, an goal difference chu -3 a ni mek.

United hian goal khung thei leh nawr na thei, chance siam tam thei player an mamawh hle. Ruben Amorim hian United a luhchilh tak tak ang a, a tum aiin thil a buaithlak nek dawn niin a lang a, chuvang chuan a lo chhawr thiam tawh sa striker Viktor Gyökeres hi a la ngei dawn niin English media te chuan an tarlang a ni.