Thawhtanni zan khan Premier League leh Manchester City te chuan thuchhuah an siam ve ve a, an inkhinnaah chak zawkah an inngai ve ve.
The Associated Party Transaction (APT) rules chungchangah Manchester City chuan Premier League an khing a, hetah hian City chuan hnehna an chang niin an inngai.
Eng nge The Associated Party Transaction (APT) chu?
Kum 2021 khan Saudi Arabia Sovereign Wealth Fund chuan Newcastle United an lei a, Saudi lam an hausa si, sum tam tak hmangin Newcastle United an vur ang a, player man to tak tak, Mbappe te, Messi te leh Ronaldo te an lei ang a, chu chuan UK-a inelna thianghlim tak chu a tihbawrhban Premier League club dang ten an hlau.
Club neitute'n sponsorship-ah sum tam tak thehchhuak angin an lang ang a, club erawhin chutiang zat zat an dawng lo thung ang a. Club revenue erawh a tam hmel ang a, player man to tak tak an lei theih dawn bakah, player hlawhah sum tam tak club-in a thehchhuak thei bawk ang a, hetiang thil hi a thleng thei a ni tiin dan siam a ngai niin Premier League club dang chuan an ngai. Chutichuan The Associated Party Transaction (APT) rules duan a ni ta a, kumin February thla atang khan hman tan a ni ta a ni.
He danah hian Club neitu hausa ten sponsorship leh loan an pek chhuah chungchangah fair taka thil kalpui tur a ni tih te a chuang a, Premier League lamin engkim an endik hmasa ang a, financial rules chu khauh taka kalpui an tum. He APT rules hi Manchester City chuan, "A ni em em lo e. Hei hian UK Competition Law a kalh a ni," tiin Premier League chu court-ah nipui lai khan an khing ta a, hearing te an neih hnuah October ni 7 khan Judge chuan thutlukna a siam ta a ni.
Tu nge hnehna chang ta?
Premier League lam leh Man City lam te chuan an inkhinnaah hian hnehna changah an inngai ve ve. A nihna takah chuan Manchester City hian an duhthusam an hmu niin a lang zawk.
Thuremna phek 175-a chhahah chuan City lam tana dinhmun thatna pawimawh tak pahnih a inthai lang a. Club neitu (shareholder) te hian club chu loan an puktir thin a, chu loan chu interest free te a ni thin bawk.
He kalphung hi APT rules-ah telh a ni ve hauh lo mai, Judge chuan shareholders loan chu APT rules-a telh ve turin thutlukna a siam a, Premier League chu APT rules-ah share holders loan telh turin tih a ni nghe nghe bawk. Hetah hian Manchester City chu an lawm hle nghe nghe.
Tin, Sponsorship chungchangah Premier League lamin fair market value (FMV) an phut. Hetah hian thil langtlang taka kalpui a ngai a, a sponsor-tute thlenga belhchian a ngaih avangin Premier League Board lam chuan thutlukna an siam lawk thei lo thin.
Manchester City chu Etihad Airlines Group nena an indawrna te, Abu Dhabi Bank nena an indawrna te leh Emirates Palace nena an indawrna te chu Premier League lamin ngun takin an ngaihtuah a, proof tur a tam lutuk avangin thla thum chuang an tikhawtlai a, khang te kha Judgement order-ah chuan proof tur tam lutuk tihtawp te a tel bawk.
Judge chuan APT rules chu siamtha deuh hlek turin a ti a, Premier League lamin an duh dan eng emaw zat chu kaltlangpui a ni tho a, hei vang hian Premier League lam pawhin chak angin an inngai. Manchester City pawhin an khinna point pawimawhah hnehna an chang niin an inngai bawk.