Manchester City chuan Rosenborg midfielder Sverre Nypan chu £12.5million-in an la lut.

Kum 18 mi Norwegian hian kum 5 chhung atan Etihad Stadium-ah contract a ziak a, a contract hian kum 2023 thleng a daih a, City hian loan-a an chhuahtir leh nghal a rinawm.

"Ka hlim kher mai, Manchester City ka zawm thei hi ka inchhuang hle bawk a ni.

"Player naupang te chuan hetianga club lian leh world class player tamna club zawm hi kan duhthusam a ni vek ang.

"Ka la naupang a, zir tur ka la ngah em em. Pep Guardiola-a enkawlna hnuaia ka kun thei tur hi ka lawm a, ani hi khawvela coach tha ber a ni a, a hnuaiah hian player tha tak ka ni thei dawn a ni.

"Norway leh Manchester City hian inkungkaihna tha tak kan nei a, Erling Haaland leh Oscar Bobb te an awm ve a, Norwegian zinga hetiang club lian zawm thei ka ni ve hi ka lawm a ni," tiin Sverre Nypan chuan a sawi.

Sverre Nypan hi Arsenal leh Aston Villa te pawhin an ngaihven a, mahse kum 18 mi talent nei tha tak Sverre Nypan hian Manchester City a thlang ta a ni.

He midfielder hian Rosenborg tan senior team-ah vawi 70 a inlan tawh a, kum 16 mi a nih atangin Norwegian top flight-ah a inlan tawh. Season liamta khan Nypan hian goal 8 a khung bakah assist vawi 1 a nei ve a ni.