Kyle Walker chuan Manchester City chhuahsan a duh thu Pep Guardiola a hrilh a, January transfer window inhawn lai hian England international hian City a chhuahsan maithei a ni.

FA Cup third round match-a 8-0 laia Salford City an sawp tum khan Walker hi squad-ah a tel ve lo a, tun season-ah tlak hniam lam a pan niin a lang a, tun hnaiah Guardiola chuan a thlauhthla nual a ni.

Kum 34 mi hian kum 2023 khan Bayern Munich a pan tep a, Saudi Arabia lam pawhin an ngaihven. Mahse Manchester City-ah a cham chhunzawm ta zel a ni.

Walker chungchang an zawh tumin Pep Guardiola chuan, "A chungchang sawi hi ka tan chuan a harsa hle, amahin la sawi se a tha ang. Kyle chuan chona thar hmachhawn a duh a, a football hun tawp lamah hian ram danga inkhelh a duh thu a sawi a ni.

"Kum hnih liamta khan Bayern Munich pan a duh thu min hrilh. Mahse Bayern Munich khan hlawh an pe sang vak dawn lo a, kei chuan kan tana a la pawimawh em em zia ka hrilh a nih kha. Kyle tel lo hian hetianga hlawhtling hi kan nih theih ka ring lo, player tha tak a ni.

"Chutih laiin tunah chuan ram danga kal a, chona thar hmachhawn a duh ta a, a rilru puthmang hi ka zah sak em em a ni. Hmun dangah kal duh mah se, a kal nghal rum rum dawn em tih erawh kan hre bik lo.

"Kan club tana a thawhrah hi a ropui hle, England team tan pawh player tangkai tak a ni a, eng pawh nise, a hma hunah hian khawi lam nge a pan dawn? Eng nge thleng dawn? Tih erawh ka sawi lawk thei lo a ni," tiin a sawi.

Walker hian kum 2017 khan Tottenham atangin Manchester City a pan a, a man kha £50million lai a ni. City a pan hnuah Premier League title 6 ngawt a la a, FA Cup 2 leh Champions League no mawi vawi 1 a chawi bawk. Etihad Stadium-ah hian thla 18 daih contract a la nei mek a ni.