Inrinni zan Premier League inkhelah Manchester City chu relegation zone-a awm Bournemouth khelmualah an leng lut a, an mikhualna hmunah an tlangnel viau a ni ang, 4-1 ngawtin hnehna an chang.
Vitality Stadium-a inkhelah hian City hian Julian Alvarez, Erling Haaland, Phil Foden leh Chris Mepham te own-goal hmangin goal li an va hlawhchhuak a. Bournemouth hian hun tawp dawn hnaihah Jefferson Lerma hmangin goal khat an thun ve bawk.
Inkhel tir lamah City in Bournemouth inkhel an zirtir a ni ber. Inkhel an thunun a, min. 15 naah Alvarez-a goal thun hmangin hma an hruai nghal reng bawk. He goal hi Gundogan-a thawhrah niin Foden chu tha zetin a pe a, Foden hi Bournemouth goalkeeper in a rawn nangching hman a, ball a per chhuak, he ball per chhuak hi Haaland-a keah tlain ani hian goal ban a pet per a, ball per let hi Alvarez hian goal ah alo chantir.
City goal hnihna hi Haaland-a thun niin, he goal pawh hi Gundogan-a thawhrah tho a ni. Mual vei lam sir atangin Gundogan hian Foden-a tan ball a thawn lut a, Foden hian goal-ah a chantir zawh loh hnuin Haaland hian 29mins ah a rawn thun ta a. First-half tawp hma hian Foden hian City goal thumna a thun ta nge nge bawk.
City game a nghet a, second-half ah pawh a danglam em em lo. Mahse Bournemouth pawh rawn insiamthain goal thun ve ngei an tum. Amaherawhchu, an centre-back Mepham a chesual hlauh, City goal hnuhnung ber leh an goal lina ni bawk chu 51mins ah a rawn thunsak hlauh.
Bournemouth hian 84mins ah Lerma hmang hian goal khat thun ve bawk mah se league-a pahnihna ni mek leh title kawltu ni lai City lehthal ngaihna a awm tawh lo.
He inkhela kan sawi hmaih miah loh tur pakhat chu Foden-a hnunga tlan kum 18 chauha upa Manchester City defender Rico Lewis kha a ni. A khel tha a, la naupang mah se City tlarhnung a ti phuisui hle. Hun tawp lamah phei chuan Guardiola hian defensive midfielder angin a chhawr tawh.
Pep Guardiola leh a naute hmabak hmasa ber chu FA Cup 5th round niin, Bristol City an hmachhawn dawn a. Hemi hnuah hian Premier League-ah Newcastle United an lo mikhual leh ang.
City chung chiaha awm leh hmahruaitu ni bawk Arsenal hian zaninah tho Leicester City chu 1-0 a an hneh ve bawk avangin an inthlauh dan ala danglam loa, point hnih bawkin an la inthlau. Mahse, Arsenal hian game khatin an la khel tlem zawk.
City hneh tak Bournemouth erawh hi chu Premier League ah a tawp ber dawttu an la ni chhunzawm a, an hnuaiah hian Southampton chiah an awm. An chung chiaha awm Everton nen hian point inang nei mah se goal difference-a an hniam zawk avangin a hnuai zawkah hian an awm a ni.