Ningani zan khan Manchester City chuan Troyes atangin Savinho an la lut fel a, kum 5 chhung atan contract ziahpuiin, a man hi €40million (£33.7m; $43.7m) a ni chho dawn a ni.

Brazilian international hi tun nipui bazar inhawn laia Man City-in an lak luh hmasak ber a ni a, a manah City hian €25m an pe phawt ang a, add-ons hi €15m vel a ni dawn niin The Athletic chuan a tarlang.

Savinho hi Brazil ram chhim chhak thingtlang khua Sao Mateus-a seilian a ni a, a pi leh pute kianga khawsa thin a ni. Ran vulh thin niin, sakawr chung chuan te, bawnghnute sawr te leh thlai enkawl chu a nuam tih zawng a ni thin.

Farm-a hun hman chu nuam a ti thin hle a, mahse kum 5 mi lek a nih laiin a coach hmasa ber a tawng a, a coach hmasa ber hian footballer tha a nih tur thu a sawi lawk nghe nghe.

Savinho hian a tir chuan beach football a khel thin a, football tak tak a khelh chhoh chuan team lian te mit a la nghal hle. Ke veilam hmang thiam a ni a, Kum 11 mi lek a nih laiin Under 17 team-ah a khel a, an khingpui Atletico Mineiro chuan tha an tih em avangin an la lut nghal.

Kum 16 mi a nih chuan senior team-ah a inlan chho ta a, Atletico player zinga Brazilian league-a khel thei naupang ber a ni a, kum 18 a nihin Libertadores Cup-ah goal a khung bawk.

Kum 2022 khan Arsenal pawhin ngaihven viau mah se, City Football Group lam sawmna a thlang ta a, City Football Group club pakhat Troyes a pan ta a ni.

Troyes atang hian PSV-ah loan-in a khel a, 2023-24 season khan City Football Group ta tho Girona chuan loan-in an la leh a, Girona tan season liamta khan game 37 khelin, goal 11 a khung bakah, assist vawi 10 a nei bawk.

Manchester City chuan kum 20 mi winger hi tun nipui bazara an player lak luh hmasak ber a ni ta. "Premier League leh Club World Cup winner ni lai Man City ka zawm hi ka hlim hle.

"Tu pawhin City hi khawvela team tha ber an ni tih kan hria a, a phurawm ka ti khawp mai.

"Pep Guardiola-a hnuaia ka awm ve thei tur hi ka phur a, ani hi khawvela coach tha ber pakhat a ni a, ani hnuaiah hian hma nasa takin ka sawn dawn a ni.

"Spain-ah khan hun duhawm tak ka hmang a, tunah player tha tak tak te kiangah ka awm tawh dawn a, Premier League ka khel dawn bawk a, a ropui ka ti khawp mai.

"City fans leh ka team-mate thar tur te hmuh thuai thuai ka nghakhlel a, City hi hlawhtlinna tam tak hlawhchhuahpui theih ka inbeisei a ni," tiin Savinho chuan a sawi.