Craven Cottage-a Fulham nen an inhnehtawk ṭum khan, inkhelh zawhah Kobbie Mainoo chu mual chhungah a rawn chhuak ve a, a hmel aṭang khan a hnual hle tih a lang chiang. Tun season Premier League game hnih an khelhah bench-ah a ṭhu ve ve a, chhawr a ni lo ve ve bawk.
Han en mai pawh khan Mainoo kha a hnual tih a lang chiang a, inkhelh zawhah Ruben Amorim khan Mainoo kha Bruno Fernandes nena hmun inchhuh an nih thu a sawi chhuak bawk a nih kha.
Attacking midfield lamah Cunha leh Mbeumo te an khel thei ve ve a, number 10-ah Mason Mount a khel thei bawk. Tin, number 10-a a chhawr ṭhin Bruno Fernandes chu Amorim chuan central midfield-ah a pawt let a, United boss ngaihtuahnaa awm ber chu Central midfield-a Bruno-a dinpui tur, a bik takin defensive midfield lam a ni tlat mai.
Heti a nih hi chuan Kobbie Mainoo-a tan chuan United team-ah hmun a awm lo niin a ngaih theih. United hian Baleba lak tumin hma an la kha a ni a, hmatawng lamah Mbeumo leh Cunha te a inkawptir a, centre forward Sesko an nei tawh bawk a, Bruno Fernandes chu Central midfield-ah a dah chho ta chawt mai.
Kum 20 mi Mainoo hi Manchester United academy chhuak a ni a, a naupan tet ata a club hi a chhuahsan thei niin a ngaih theih. Thawhṭanni hian transfer window khar a ni dawn a, United hian Mainoo hi hralh chu an phal chiah lo, mahse Amorim-a game plan-ah a leng lo tih a chiang tawh a, hei vang hian Mainoo hian a khelh tam theihna tur hmun pan mai a duh dawn niin a lang.
United hian 'Bomb squad' an nei a, chung ho chu Alejandro Garnacho, Antony, Jadon Sancho leh Tyrell Malacia te an ni. Anni hi Carrington-ah trainning nei mah se, anmahniin a hranin an training a, Sesko an lak tawh bawk avangin Rasmus Hojlund chu thehchhuah an tum bawk nia report a ni a, Mainoo pawhin chhuah a duh dawn nia ngaih a ni bawk.
Casemiro a lo upa deuh tawh a, a che muang ta deuh. Tin, Ugarte pawh tharum ngah viau mah se, a passing a ṭha tawk lo a, game play tak tak turin duhthu a sam lo. Amorim chuan Bruno Fernandes-a dinpui tur defensive midfielder ṭha tak a zawng, Carlos Baleba kha ngawrh takin an dawr, mahse a man a to em avang leh, Brighton lamin chhuahtir an phal loh avangin an bansan ta kha a ni a.
United hian an bomb squad te hi an hralh nual hman a nih chuan, defensive midfielder chu transfer window khar a nih hma ngei hian an dap leh chu a rinawm.
Bayern Munich chuan Mainoo an ngaihven ve deuh a, mahse tihtak zetin an ngaihven lo niin The Athletic chuan a tarlang. Bayer Leverkusen manager thar Erik ten Hag chuan a lo enkawl tawh Mainoo hi lak theih dan a dap dawn niin media te chuan a tarlang mek bawk.
January transfer window inhawn lai khan Chelsea chuan Mainoo an ngaihven a, mahse United khan £70million vel lai an chhiar a, Blues khan an la ngam ta lo. Tunah chuan Mainoo-a hlutna hi £45million vel chauh a ni tawh niin The Athletic chuan a tarlang.
Tottenham pawh Mainoo duhtu zingah an tel nia report a ni a, hetih lai hian indawrna erawh a la awm lo. Spanish club lian Real Madrid pawh Mainoo nen sawi zawm ni mah se, transfer titi lengvak mai mai a la ni rih. A chhuak dawn a nih chuan tun kar chhung hian kan hre thei turah ngai ang.
Kum 2023 February thla khan Mainoo hian Old Trafford-ah kum 4 daih contract thar a ziak a, hetah hian kum khat danga pawt sei theihna ziah tel a ni bawk. Khatih lai khan United tan Mainoo hi senior team-ah vawi 2 chiah a inlan a, chung pawh Carabao Cup lamah a ni bawk.
Erik ten Hag-a hnuaiah hmuhnawm takin a rawn khel chho. Mahse Amorim chuan game plan dang a lo nei leh daih bawk si nen. United-a bench-a ṭhut reng a duh loh chuan, khaw dang a hawi a ngai ang.
United tan academy chhuak an hralh hian a hlawk a, United hotute pawhin Mainoo hian chhuah a duh chuan hralh an pawitih a rinawm chiah loh. Chutih laiin player naupang talent nei ṭha tak a ni a, kum rei tak chhung United innghahna la ni thei a nih avang erawh chuan, fans lam chuan a chhuak a nih chuan a ui khawp ang le.