European team lian zawk ten an ngaihven Rayan Cherki chu a khelhna club Lyon chuan January thla-a thlasik bazar a inhawn hunah an hralh phal niin Goal chuan a tarlang.

France U21 international hi French club Lyon hian euro maktaduai-a dawrtu an awm a nih chuan an hralh phal tih tarlan a ni a, thlalehah Cherki hi dawrtu an awm ngei a rinawm hle.

Kum 20 mi hi kumin nipui bazar lai khan Premier League club lian Chelsea nen pawh sawizawm a lo ni tawh a, Ligue 1 club lian Paris Saint-Germain pawhin an duh nia sawi a ni.

Tun season-ah Lyon hi Ligue 1-ah an che chhe hle a, Cherki hian game 14 khel tawhin, assist vawi 1 a nei tawh tih loh chu goal-ah a la inrawlh lova, season chawhnu lam hi club dangah a khel lovang tih a sawi theih loh.

A man a to lo bawk nen Chelsea leh PSG te hian Cherki hi thlasik bazar a inhawn hunah an inchuh a rinawm viau a, Lyon hian a manah euro maktaduai 20 chhiar mah se, PSG leh Chelsea ten an inchuh a nih chuan a man hian euro maktaduai 30 pawh a kai chho maithei.

Cherki hi Premier League club dang pahnih West Ham leh Arsenal te pawhin an ngaihven niin chanchin thenkhat chuan tarlang mah se, Chelsea leh PSG te hi sum ngah an nih avangin West Ham leh Arsenal te hian hma an lak tak tak a rinawm loh a ni.