Juventus-in Belgian striker Lukaku lak tuma an dawrna chu, Chelsea chuan an lo hnawl. 

Lukaku hian Inter-ah loan-in hun a hmang zo chiah a, Chelsea pre-season tour-ah a tel ve lo a, Chelsea chhuahsan tura beisei mek a ni.  

Inter hian a ngheta Lukaku neih tumin tan an la ve char char thin a, mahse Juventus lam nen an inbia nia thu a than hnuah Inter lam hian an ngaihven chhunzawm ta lo. 

Inter-a a teammate hlui Lautaro Martinez pawhin tun nipuia Lukaku-a nungchangin a tihlawm loh thu a lo sawi chhuak tawh bawk a ni.

Juventus chuan Lukaku hi an ngaihven deuh a, loan hmanga Chelsea indawrpui an tum. Mahse Chelsea lam chuan an dawrna dawn hi a phurpui tehchiam lo.

Chelsea chuan Lukaku hi hralh an duh a, chumi tur chuan kawng an dap dawn. Stamford Bridge atanga chhuahtir chu an tum ber niin chanchinbu mite chuan an tarlang.

Saudi Arabia lam atang pawhin Lukaku hian betu a nei ve tho a, mahse Middle East lama insawn a la duh bik chiah lo, Europe-a cham rih a la duh zawk. Duhthlan tur dang a ngah hran lo a, Saudi lam sawmna pawh an la hnar fithla thak chuang lo.

Lukaku hian  May thla khan kum 30 a tling a, kum 2021 khan Inter chhuahsanin Chelsea-ah contract a ziak nawn leh a, kum 3 daih contract a la nei a ni.