Chelsea chuan nizan zanlai khan tun season atana an UEFA Champions League game hmasa ber khelin, Russian club Zenit St.Petersburg an lo mikhual a, Chelsea hi an striker thar Romelu Lukaku goal khat hmangin an chak.

Zenit lakah Lukaku hian second half-ah goal-ah ball a tauh lut a, heti hian Belgian striker hian Chelsea-a a kir hnuah game li khel tawhin goal li a khung tling tawh.

Chelsea manager Thomas Tuchel chuan Lukaku chu world-class striker a nih thu a sawi a, an player mamawh tak a nih thu German manager hian inkhelh zawhah a sawi bawk a ni.

Tuchel chuan, “Romelu tan khan khelh a harsa tih ka hria a, a chhan chu chance kan siam chhuah sak tam lo. Mahse ani hi chu a inrintawkna hloh ve mai mai chi a ni lova, chu chu world-class striker a nih chhan tak pawh a ni.

“Kan tan a pawimawh hle a, a mah anga tha hi striker hmuh mai mai tur an tam lo. A tel lo pawhin kan lo chak tawh thin a, mahse a mah ang chi hi kan tlakchham thin kha a ni a, a talent chauh ka sawi lova, a mizia thlengin ka sawina a ni.

“Mi inngaitlawm tak a ni a, dressing room-ah a tangkai a, a bul vela mite tan boruak a chawk phur thin a, chu chu kan mamawh a, kan chhuang em em bawk. Romelu kan nei a, a chungah hian kan lawm a, a chhan chu a bula mite inrintawkna a pe tel thin a ni,” a ti.