Luis Diaz manah Liverpool leh Bayern Munich te chu €75million (£65.6m; $88.1m)-in an inrem ta niin The Athletic chuan a tarlang.

Diaz hi Tokyo-ah a awm mek a, Liverpool pre-season tour-ah tel ve mekin, The Reds chuan Colombia international hi Germany pan an phalsak ta bawk a ni.

Bayern Munich hian Luis Diaz hi lak an tum ngat ngat hle, nipui bazar inhawn hlim khan €67.5m (£58.6m; $78.8m)-in an dawr a, hei hi Liverpool chuan an lo hnar a nih kha. Chumi hnua indawrna a kal chhunzawm zel.

Pre-season friendly match-a AC Milan an hmachhawn tumin Diaz hi a inlan ve ta lo a, hetah hian Arne Slot chuan transfer chungchang an buaipui avanga tel lo a nih thu a sawi chiang a nih kha.

Diaz hian kum 2027 June thla thleng Liverpool-ah contract a la nei a, Anfield chhuahsan a duh tih a sawi chiang a, Liverpool hian ui hle mah se, an chelh thei ta lo a ni.

Tun nipui bazarah Liverpool hian Jarell Quansah, Caoimhin Kelleher, Trent Alexander-Arnold leh Nathaniel Phillips-te an lo chhuahtir tawh a, Darwin Nunez pawh an chhuahtir dawn nia report a awm mek a, Harvey Elliott pawhin a hma hun tur chungchang a ngaihtuah dawn thu a sawi ve tawh bawk.

Liverpool hian Frankfurt atangin Hugo Ekitike an la lut tawh a, a manah £69million ($93.4m) bakah add ons £10m an thehchhuak a, Liverpool hian Newcastle United atanga Alexander Isak lak luh an la tum tho nia report a ni.

Kum 2022 January thla khan Diaz hian Porto atangin Liverpool a pan a, a man kha £37.5m nia report a ni a, add-ons te nen chuan £50m vel kai thei tur a ni a, tunah a chhuak dawn ta si a, an inleina man kha £43m vel bawr a ni ta a ni.

Liverpool tan game 148 a khel a, goal 41 khungin, assist vawi 23 a nei hman. Season liamtaa Premier League no mawi an chawi khan Diaz hian tha a thawh hlawk hle a, league game 36 khelin, goal 13 a khung nghe nghe a ni.