Bayern Munich chuan Liverpool atanga Luis Diaz an lak luh thu an puang.

Kum 28 mi hian kum 4 chhung atan contract a ziak a, a contract hian kum 2029 thleng a daih. A man hi €70million bakah add-ons €5m nia report a ni.

Tun nipui bazar tir lamah khan Bayern Munich hian Luis Diaz manah €67.5m (£58.6m; $78.8m) an thehchhuak a, kha kha Liverpool chuan an lo hnar a nih kha.

Tun Pathianni liamta khan Bayern Munich chuan €75m(£65.6m; $88.1m) an thehchhuak leh a, hetah hian club pahnih te chuan inremna an nei thei ta a ni.

Diaz hian kum 2027 thleng Anfield-ah contract a nei kha a ni a, amah hian Bayern FC zawm a duh a, AC Milan nen friendly match an khelh tum khan a tel ve ta lo a, Slot khan a chhuah tur thu a sawi a nih kha.

Bayern Munich hian Florian Wirtz lak tumin hma an la ve ngar ngar a, mahse Liverpool an ngam lo. Spain international Nico Williams pawh lak tumin hma la mah se, Nico hian Athletic-ah contract thar a ziak leh ta zawk si. Luis Diaz-a lam an hawi a, an inlei thei ta nge nge a ni.

Diaz hian kum 2022 January thla khan Porto atangin Liverpool a zawm a, a man kha £43m nia report a ni.

Liverpool tan game 148 a khel ve hman a, goal 41 khungin, assist vawi 23 a nei. Season liamta khan Premier League-ah game 36 lai a khel a, no mawi an chawi theih nan tha a thawh hlawk hle a ni.