Lucas Vazquez chuan Real Madrid a chhuahsan hnuah club thar a nei dawn ta a, Erik ten Hag-a'n a enkawl Bayer Leverkusen lam a pan ta.

Thawhlehni hian Vazquez hian Germany a pan a, a football khelh hunchhung zawng zawng Real Madrid tan a hmang dawn emaw tih laiin, club thar a nei dawn ta a ni.

Kum 34 mi right midfield leh right back-ah a chhawr theih a, Club World Cup semi final atanga an tlak rual khan Real Madrid a chhuahsan thu a puang a ni.

Spanish capital-ah hian Vazquez hian kum 18 lai hun a hmang a, Real Madrid tan a hun zawng zawng a hmang zo titih, 2014-15 season khan Espanyol-ah loan-in a khel ve.

Midfield leh tlarhnung lamah pawh a chhawr theih ve ve a, Dani Carvajal-a thachhang dawltu a ni thin a, Real Madrid-in Trent Alexander-Arnold an lak hnuah erawh Vazquez-a tan hian Real Madrid-ah hmun a awm ta lo a ni.

"Real Madrid-a ka duhthusam chu ka hlen chhuak ta," tiin Vazquez chuan Real Madrid a chhuahsan khan a sawi.

Los Blancos tana a khelh chhung hian trophy 20 lai a chawi a, heng zingah hian Champions League no mawi 5 leh La Liga no mawi 4 a tel a, Real Madrid tan game 400 chuang a khel bawk.

Kum 2016 leh 2018 inkar khan Spain tan a khel a, Euro leh World Cup-ah a inlan ve a ni.