Sum ren, player manto lei ngam lo tia sawiselna tam tak dawngtu Arsene Wenger chuan 'Spanish Vardy' an tih mai Perez chu £17m zetin a lalut ta a, Perez hi Arsenal-ah hian enge a an ang? Risk a sang mah mah ang em? Perez hi an mamawh tak a ni em? Tih chu zawhna lian tak a ni ta a ni.

A hun hman tawh dan te lo thlir ila, Perez hian a carrer tir lamah Youth club pathum tan a khel phawt a, hemi hnu hian Athletico Madrid C team tan a khel tan a. Kum 2009 khan Raya Vallecano a zawm a season hnih a chamin reserve-ah a awm deuh ber a, game 7-ah goal 1 a khung a ni.

January 17, 2011 khan Ukrainian Premier League team FC Karpaty Lviv a zawm a, Karpaty Lviv-ah hian season thum a cham a, game 60 khelin goal 15 a khung a ni.January 2013-ah Dynamo Kyiv loan-in a zawm a thla ruk a cham chhungin game engzatmah a khel lo a ni.

2013 July ni 5-ah Superleague Greece Club PAOK chu €700,000 in a zawm leh a. PAOK tan hian game 50 khelin goal 10 a khung a ni.

2014 July ni 18 khan Spain-ah bawk let lehin kaithar Deportivo de la Coruna chu kum 1 atan loan-in a zawm a. Game 21 khelin goal 6 a khung a, 2015 July ni 23-ah PAOK-ah bawk a let leh a, game 2 khelin goal 2 a khung a ni.

Hemi hnu august ni 12, 2015-ah loan-a a chhuahna Deportivo ah let lehin kum 4 atan contract a ziak a. Season chawhma lam a ral meuh chuan game 15-ah goal 11 a khung der a ni. 2015-16 season-ah hian game 37 khelin goal 17 a thun a ni.

2016-17 season tan a ni a Deportivo tan game 1 a inlan hman a goal 1 a khung bawk a, hemi hnu hian Arsene Wenger chuan Gunners player ni turin Emirates Stadium-ah a lalut ta a ni.

Arsenal-in an striker duh Jamie Vardy an lak theih loh takah chuan Spanish Vardy an tih mai, tlan chak tak Lucas Perez hi an lalut ta a. A statistics en hi chuan hma a sawnin beiseina pawh a sang khawp mai. Gunners mamawh chhanna a ni ang em? Nge ni a a zuihral mai zawk dawn? Lo thlir ang le.