March 6, 2021 (Inrinni) zan dar 8-ah R Dengthuama Indoor Stadium, Mualpui, Aizawlah LPS Fight Night buatsaih a ni dawn a, Mizoramin professional boxing a thlen hmasak berah hian Lalrinsanga Tlau (India) leh Eric Quarm (Ghana) chuan World Boxing Council Youth World Super Featherweight title an inchuh dawn a ni.
Inrinni zanah hian inhnek vawiruk a awm dawn a, Lalrinsanga Tlau nen Mizo boxer panga an inlan dawn a, Mizo boxer zawng zawng nen Indian boxer pakua an tel ang. Ram dang atangin boxer pathum an inlan tel dawn a, Ghana, DR Congo leh Afghanistan atangin boxer pakhat theuh an inhnek ang.
LPS Fight Night hian Mizoram tan kawng hrang hrangin mellung a phun dawn a. Mizo leilungin professional inhnek a thlen hmasak ber a nih bakah title chuhna inhnek a thlen vawikhatna a ni nghal ang. Event vawikhata Mizo professional boxer an inlan tam ber tur niin mi panga an inhnek dawn a, a ruala Mizo boxer-in professional boxing-a bul an tan hnemna ber a ni ang a, mi pathumin a vawikhat nan inhnek an hmachhawn dawn a ni.
March 5, 2021 (zirtawpni) zan dar 8-ah LPS Auditorium, LPS Office building, Zarkawtah inhnek tur boxer 12 an inbuk dawn a, hmaichhanah an inhmachhawn nghal bawk ang. Inbukna hun hi LPS Vision chuan live telecast-in a pe chhuak dawn a ni.
MAIN EVENT : WBC YOUTH WORLD CHAMPIONSHIP
LALRINSANGA TLAU (India) v ERIC QUARM (Ghana) : Round 8
(Super Featherweight - kg 59)
WBC Youth World Super Featherweight title a lak hnuah Sultan Zaurbek (Kazakhstan) chuan vawikhat mah kawnghren humhim hman lovin kum 24 a tling a, title a kalsan (vacant).
January 15, 2021 khan WBC Youth Championship Program Chairman Rex Rose Walker chuan Colorado, USA atangin LPS Vision Production Promotion leh a thawhpui Grassroot Boxing Promotion and Management hnenah WBC Youth World Super Featherweight title inchuha Lalrinsanga Tlau (India) leh Eric Quarm (Ghana) inhnek buatsaih turin phalna a pe a, March 6, 2021-ah Mizoram, India-a buatsaih tura rawtna awm a pawmpui nghal bawk.
Mizo zinga professional boxer hmasa ber Lalrinsanga Tlau chuan vawili a inhnek tawhah hnehna a chang vek a, mi pahnih a knockout. Kum 21 mi Sangtea hian March 9, 2020 khan a vawikhat nan African boxer hmachhawnin, Dubai-ah round ruk an inhnek hnuin Tanzanian fighter Haidari Mchanjo a hneh a, judge pathum point pekah round tin a la vek a ni.
A chet that avangin WBC Youth title chuh thei khawpin a dinhmun a siam. Mizo zingah professional title chuh hmasa ber a nih dawn a ni tih a hriat hnu, January 30 khan Mumbai-ah Prince Shrivastava nen inhnekin round thumnaah technical knockout hmangin a hneh.
Kum 23 mi Quarm chuan professional boxing vawinga khel tawhin, tum li a chak a, vawikhat a tlawm. December 28, 2019 kha a inhnek hnuhnun ber niin West African Union lightweight title chuhin Lagos, Nigeria-ah champion lai Nigerian boxer Real One Oladosu nen round 10 an inhnek a, unanimous decision-in a tlawm.
Tun tumah hian Ghana rama boxing coach hriat hlawh tak Daniel Larteykwei ruaiin India rama a vawikhat nan a inhnek dawn a ni.
CO-MAIN EVENT :
ASAD ASIF KHAN (India) v AIMAL AHMED SEDIQ ZADA (Afghanistan) : Round 6
(Featherweight - kg 57.2)
Asad Asif Khan hi LPS Fight Night-a inlan tur boxer zinga professional tawn hriat ngah ber a ni a, vawi 12 a inhnek tawhah vawikua chakin tum hnih a tlawm a, vawikhat a inhnehtawk. Asad hian December 2019 khan Philippines-ah IBO Oceania title a la a, tun thlengin a la kawl reng a ni.
Afghan boxer Aimal Ahmed Sediq Zada hian professional boxing vawiruk khel tawhin tum nga a chak a, vawikhat a tlawm.
UNDER CARD :
JOSEPH EMMAUNEL NGINDU (DR Congo) v C LALHRUAITLUANGA (India) : Round 6
(Super Welterweight - kg 69.9)
DR Congolese boxer, kum 27 mi Joseph Emmanuel hian professional boxing vawithum khel tawhin tum hnih a chak a, vawikhat a tlawm. Mualpui tlangval C Lalhruaitluanga'n professional boxing a khelh vawikhatna tur a ni ve thung
RAKESH KRISHNAN (India) v VANLALAWMPUIA (India) : Round 6
(Super Lightweight - kg 63.5)
Kum 29 mi Rakesh Krishnan hian professional boxing vawihnih khel tawhin a tlawm ve ve a. Vanlalawmpuiah professional boxing vawikhat a khelh tawhah hnehna changin, January 30, 2021 khan Mumbai-ah Anish Sharma nen inhnekin round hnihnaah technical knockout-in a chak. Khuangthing tlangval, kum 23 mi hian Super Boxing League khel tawhin LPS Pro Fight hnuhnung ber March 2019-ah inhnial theih takin lightweight title fight-ah Lalrinawma a hneh lo a ni.
MAZHAR HUSSAIN (India) v F ZORAMCHHANA (India) : Round 6
(Super Bantamweight - kg 55.3)
Kum 29 mi Mazhar Hussain hian professional boxing vawihnih khel tawhin a chak ve ve. Hetih lai hian Cherhlun tlangval F Zoramchhana'n a vawikhat nan professional boxing a khel dawn a, LPS Pro Fight hnuhnung ber March 2019-ah lightflyweight title fight hmachhawnin champion lai NT Lalbiakkima lakah unanimous decision-in a chak lo a ni.
ROHIT CHOUDHARY (India) v HC Lalramfela (India) : Round 4
(Welterweight - kg 66.7)
Rohit Choudhary hian professional boxing vawihnih khel tawh mah se a tlawm ve ve a, a vawikhat nan chak tumin professional huanga tawn hriat la nei lo a hmachhawn dawn. Chawngtlai tlangval HC Lalramfela'n a vawikhat nan professional boxing a khel dawn a, inhnek hun tur a thlen hmain ni riat a la awm tihin khel tura thlan fel tawh Zochhuanawma Fanai ai awh tura ruat fel a ni a, 2015 LPS Pro Fight bantamweight-ah champion-in Pro Fight hnuhnung ber March 2019 khan bantamweight title chuh tur zawnna final-ah champion ni zui ta Laldingliana a hneh lo a ni.
LPS FIGHT NIGHT OFFICIAL TURTE :
Indian Boxing Council atangin Murli (Pune) chu Supervisor tur a ni a, WBC doctor Sanjogita Soodan (Jammu & Kashmir) chu ringside doctor tura rual fel a ni bawk. Referee turin WBC referee Manoj Panwar (Delhi) thlan a ni a, judge pathum thu turte chu - Ajay Salvi (Mumbai), Surash Verma (Delhi) leh MD Ali (Bengaluru) an ni.